काठमाडौं । कोशी प्रदेश योजना आयोगको सदस्यमा नमिता न्यौपाने नियुक्त भएकी छन्। मोरङ जिल्ला केराबारी गाउँपालिका–२ की न्यौपाने सानिमा रिलायन्स लाइफकी अभिकर्ता हुन्।
प्रदेश मन्त्रिपरिषद्को मंगलबारको बैठकले न्यौपानेसहित काठमाडौं महानगरपालिका–९ का डा सीताराम बस्नेत र सोलुखुम्बु जिल्ला मुक्ली गाउँपालिका–६ का किशोरकुमार राईलाई सदस्य नियुक्त गरेको हो। न्यौपाने लामो समयदेखि अभिकर्ता पेसामा सक्रिय छिन्।
यसैगरी कोशी प्रदेशका मुख्यमन्त्री हिक्मतकुमार कार्कीले प्रदेश योजना आयोगका नवनियुक्त सदस्यहरुलाई बुधबार पद तथा गोपनीयताको शपथग्रहण गराएका छन्। शपथग्रहण कार्यक्रम मुख्यमन्त्री तथा मन्त्रिपरिषद्को कार्यालय विराटनगरमा आयोजना गरिएको थियो। समारोहमा प्रदेशका विभिन्न मन्त्रालयका मन्त्री, प्रदेशसभा सदस्य, प्रदेश योजना आयोगका उपाध्यक्षलगायतको उपस्थिति थियो।
