काठमाडौं । तिहारको बिदामा पनि भन्सार जाँचपासका लागि आवश्यक बैंकिङ सेवा सुचारु रहने भएको छ।
नेपाल राष्ट्र बैंकले आज क, ख र ग वर्गका बैंक तथा वित्तीय संस्थाका नाममा परिपत्र जारी गर्दै यस्तो निर्देशन दिएको हो। भन्सार विभागबाट प्राप्त पत्रका आधारमा राष्ट्र बैंकले बैंक तथा वित्तीयलाई व्यापार सहजीकरण गर्न, आपूर्ति प्रणाली सुचारु राख्न तथा सेवा प्रवाहको निरन्तरता कायम गर्न मालवस्तुको भन्सार जाँचपास गर्ने प्रयोजनका लागि तिहार बिदामा पनि बैंकिङ सेवा सुचारु राख्न निर्देशन दिएको छ।
तिहारका अवसरमा कात्तिक २२ गतेदेखि कात्तिक २६ गतेसम्म बिदा रहेको छ। यो अवधिमा भन्सार कार्यालयमा रहेका शाखाबाट बैंकिङ सेवा सुचारु राख्ने व्यवस्था मिलाउन राष्ट्र बैंकले निर्देशन दिएको छ।
