काठमाडौं । संस्थागत बीमा अभिकर्ताले आफ्नो नामको पछाडी ‘बीमा अभिकर्ता’ वा ‘Insurance Agent’ राख्नु पर्ने भएको छ । नेपाल बीमा प्राधिकरणले सम्पुर्ण बीमा कम्पनीहरुलाई परिपत्र जारी गर्दै संस्थागत बीमा अभिकर्ताको लागि आवेदन दिने संस्थाहरुलाई आफ्नो नामको पछाडी अनिवार्य रुपमा ‘बीमा अभिकर्ता’ भन्ने शब्द राख्न निर्देशन दिएको हो ।
प्राधिकरणका अनुसार संस्थागत बीमा अभिकर्ताको इजाजतपत्रका लागि प्राप्त आवेदनहरुमा त्यस्ता आवेदकहरुको नाममा प्रयोग गरिएका ‘बीमा तथा सो सम्बद्ध’ शब्दहरुले बीमा सेवा प्रदायकका सम्बन्धमा सेवा ग्राहीमा द्धिविधा उत्पन्न भएको पाइएको छ । कतिपय नाममा बीमा नै नरहेको पाइए पछि प्राधिकरणले यस्तो परिपत्र जारी गरेको हो ।
बीमा ऐनमा संस्थागत बीमा अभिकर्ताको व्यवस्था रहेको छ । यस्ता संस्थागत बीमा अभिकर्ताले एउटा मात्रै बीमा कम्पनीको पोलिसी बिक्री गर्न पाउछन् । बीमा प्राधिकरणले यस्तो निर्देशन जारी गरे पनि अझै पनि अभिकर्ताको लाइसेन्सको विषयमा अन्योलता कायमै छ । नियमावली नबन्दा प्राधिकरणले आवस्यक निर्देशिका निर्देशन जारी गर्न पाएको छैन । नयाँ ऐनमा अभिकर्ताको लाइसेन्स दिदा अनिवार्य परीक्षा लिनु पर्ने व्यवस्था गरिएको छ ।
