काठमाडौं । आइएमई लाइफ इन्स्योरेन्स कम्पनीले आफ्नो कम्पनीको शेयर रजिष्ट्रार सम्बन्धी कार्य गर्नको लागि ग्लोबल आइएमई क्यापिटललाई शेयर रजिष्ट्रारमा नियुक्त गरेको छ । सो सम्बन्धमा ग्लोबल आइएमई क्यापीटलको रजिष्टर्ड कार्यालय, नक्साल, काठमाडौंमा आज असार २८ गते आयोजना गरिएको एक कार्यक्रममा बीमा कम्पनी र क्यापिटल बीच शेयर रजिष्ट्रार सम्बन्धी सम्झौता सम्पन्न भएको छ ।
सम्झौतापत्रमा बीमा कम्पनीकोे तर्फबाट प्रमुख कार्यकारी अधिकृत कबि फुयाँल र क्यापिटलको तर्फबाट प्रमुख कार्यकारी अधिकृत पारस मणी ढकालले हस्ताक्षर गरे ।
कम्पनीको शेयर रजिष्ट्रारमा नियुक्त भएसँगै अब कम्पनीको धितोपत्र कारोबार सम्बन्धी अभिलेख राख्ने, दाखिला खारेज, नामसारी लगायतका शेयरधनीहरुको लगत अद्यावधिक गरी राख्ने सम्बन्धी सम्पूर्ण कार्य ग्लोबल आइएमई क्यापिटल मार्फत हुनेछ ।
कम्पनीले २०७४ असार २० गते नेपाल बीमा प्राधिकरण (तत्कालिन बीमा समिति) बाट जीवन बीमाको कार्य गर्ने ईजाजतपत्र गरी २०७४ साउन १ गतेदेखि बीमा व्यवसायको कार्य सञ्चालन गर्दै आएको र हाल कम्पनीको अधिकृत पुँजी रु.५०० करोड तथा जारी तथा चुक्ता पुँजी रु.४०० करोड रहेको छ ।
नेपालभर १४० वटा शाखा/उपशाखा कार्यालय रहेको छ । कम्पनीले वैदेशिक रोजगारीमा गएका नेपालीका लागि विक्री खुला गरेको आइपीओ विक्री गरी बाँडफाँड समेत गरिसकेको छ । त्यस्तै, असार २१ गतेदेखि असार २५ गतेसम्म सर्वसाधारणको लागि शेयरको निष्काशन तथा बिक्री खुल्ला भएको यस कम्पनीको सार्वजनिक निष्काशनमा सर्वसाधारण लगानीकर्ताहरुको उत्साहप्रद सहभागिता रहेको थियो ।
चालू आर्थिक वर्षको तेस्रो त्रयमाससम्म कम्पनीले रु.२ अर्ब ९८ करोड ५८ लाख कुल बीमा शुल्क आर्जन गरेको छ । साथै सोही अवधिसम्ममा कम्पनीको जगेडा कोषमा रु.१ अर्ब १० करोड ५ लाख रुपैयाँ सञ्चिती रहेको छ भने जीवन बीमा कोषमा रु.६ अर्ब ७ करोड ७३ लाख रुपैयाँ रहेको एवं कम्पनीको दीर्घकालिन लगानी तथा कर्जा रकम रु.८ अर्ब ४ करोड ७१ लाख रुपैयाँ रहेको छ । तेश्रो त्रयमाससम्ममा कम्पनीको खुद नाफा रु.१८ करोड २४ लाख रुपैयाँ रहेको छ भने यस अवधिसम्म कम्पनीको वार्षिक प्रति शेयर आम्दानी रु.८ रुपैयाँ ६९ पैसा र प्रति शेयर नेटवर्थ १४३ रुपैयाँ ६७ पैसा रहेको छ ।
