काठमाडौं । नेशनल लाइफ इन्स्योरेन्स कम्पनी लिमिटेडले आफ्नै एकाउन्न प्रतिशत लगानीमा मर्चेन्ट बैंक संचालन गर्ने भएको छ । कम्पनीले नेपाल धितोपत्र बोर्डमा “नेशनल क्यापिटल लिमिटेड” नामक मर्चेन्ट बैंक दर्ता गर्ने अन्तिम तयारीमा रहेको छ । कम्पनी रजिष्ट्रारको कार्यालयमा भने मङ्सिर २२ गते शुक्रबार नै दर्ता गरिसकेको छ ।
नेशनल क्यापिटलको अधिकृत पूँजी ३० करोड रुपैयाँ तोकिएको छ भने जारी पूँजी ३० करोड रुपैयाँ रहेको छ । हालको चुक्ता पूँजी भने २० करोड रुपैयाँ छ । भविष्यमा प्राथमिक शेयर जारी गर्ने योजना बनाएको छ ।
कम्पनीले आफ्नो लगानी विविधिकरण गर्ने क्रममा मर्चेन्ट बैंकमा लगानी गर्ने भएको हो । पछिल्लो समय बीमा कम्पनीहरुले मर्चेन्ट बैंकमा लगानी गर्ने लहर चलेको छ । एशियन लाइफ इन्स्योरेन्स कम्पनीले वेल्थ म्यानेजमेन्ट किनेर “एशियन क्यापिटल” बनाएको थियो । एशियनको उक्त कदमसँगै, नेपाल लाइफले नेश्ननल मर्चेन्ट क्यापिटलको बहुमत शेयर खरिद गरेर “नेपाल लाइफ क्यापिटल”, रिलायबल नेपाल लाइफले “रिलायबल इन्भेष्टमेन्ट एण्ड मर्चेन्ट क्यापिटल “ , सन नेपाल लाइफले “सन लाइफ क्यापिटल” संचालनमा छन । जीवन तथा निर्जीवन बीमा कम्पनीहरु पछिल्लो समय मर्चेन्ट बैंक तर्फ आकर्षित भएका छन् ।
