काठमाडौं । बैदेशिक रोजगार बीमा व्यवसाय ४५ प्रतिशतले बढेको छ । नेपाल बीमा प्राधिकरणका अनुसार चालु आर्थिक वर्षको बैशाख महिनासम्ममा जीवन बीमा कम्पनीहरुले वैदेशिक रोजगार जीवन बीमालेख बिक्री गरेर २ अर्ब ७१ करोड रुपैयाँ बीमा शुल्क आर्जन गरेका छन् । जवकी यस भन्दा अघिल्लो आर्थिक वर्षको यहि अवधिमा जीवन बीमा कम्पनीहरुले एक अर्ब ८६ करोड रुपैयाँ बीमा शुल्क आर्जन गरेका थिए ।
बीमा कम्पनीले जारी गरेको यस्तो बीमालेख संख्या समिक्षा अवधिमा १५ लाख २३ हजार २६८ वटा रहेका छन् । जवकी गएको वर्षको यहि अवधिमा ८ लाख ५४ हजार ६७ वटा पोलिसी जारी गरेका थिए । पोलिसी संख्या ७८ प्रतिशतले बढे पनि बीमा शुल्क आर्जन भने जम्मा ४५ प्रतिशतले मात्रै बढेको छ ।
सन नेपालको बजार खोसियो
नेपाल बीमा प्राधिकरणले पुल मार्फत हुँदै आएको वैदेशिक रोजगार बीमा व्यवसायलाई पुल मुक्त बनाए पछि सन नेपाल लाइफले बजार कब्जा गरेको थियो । गएको वर्षको बैशाख महिनामा सन नेपालको बजार हिस्सा ८० प्रतिशत थियो । तर यस वर्षको बैशाख महिनामा ३५ प्रतिशतमा झरेको छ ।
गएको बैशाख महिनामा सन नेपालले यस व्यवसायबाट मात्रै एक अर्ब ५० करोड रुपैयाँ बीमा शुल्क आर्जन गरेको थियो । तर यस वर्षको बैशाख महिनासम्ममा जम्मा ९५ करोड ९९ लाख रुपैयाँ आर्जन गरेको छ । सन नेपालको व्यवसाय आइएमई लाइफ, नेपाल लाइफ र सुर्यज्योति लाइफले खोसेका छन् ।
