काठमाडौं । नेपाल राष्ट्र बैंकले आजदेखि दशै तिहारलाई लक्षित गरी नयाँ नोट वितरण सुरु गरेको छ । गएका वर्षमा कोभिड १९ को संक्रमणका कारण राष्ट्र बैंक आफैले नयाँ नोट वितरण गरेको थिएन । यस वर्ष भने राष्ट्र बैंकले अन्य बैंक तथा वित्तीय संस्थाका अतिरिक्त आफैले नयाँ नोटको सटही सुरु गरेको हो ।
अन्य बैंकहरुले भदौ २६ गतेदेखि नै नयाँ नोट वितरण गर्न सुरु गरिसकेका छन् । तर दशै तिहारका लागि राष्ट्र बैंकबाटै नयाँ नोट लिने बानी परेका सर्वसाधारणको भिड लागेको छ । राष्ट्र बैंकले सर्वसाधारणका लागि ५ रुपैयाँका नोटदेखि एक सय रुपैयाँसम्मको १००/१०० वटाको दरले १८ हजार ५०० रुपैयाँ वितरण गरिरहेको छ ।
अन्य बैंक वित्तीय संस्थाहरुले पनि नेपाल राष्ट्र बैंकबाट २ देखि ५ करोड रुपैयाँसम्मको नयाँ नोटको सटही सुविधा पाउने व्यवस्था गरिएको छ । यस वर्षको दशैलाई मात्रै लक्षित गरि राष्ट्र बैंकले १० देखि १३ अर्ब रुपैयाँको नयाँ नोट बजारमा पठाउने तयारी गरेको छ । गत वर्ष राष्ट्र बैंकले बजारमा ७ अर्बको मात्रै नयाँ नोट पठाउदा समस्या देखिएको थियो ।
