काठमाडौं । चीनको स्वायत्त क्षेत्र तिब्बतमा बिहीबार साँझ आएको शक्तिशाली भूकम्पमा परी कम्तीमा १६ जनाको मृत्यु भएको छ भने सयौँ घाइते भएका छन्।
चिनियाँ सरकारी सञ्चारमाध्यमका अनुसार तिब्बतको पहाडी क्षेत्रमा ७ म्याग्निच्युडको भूकम्प गएको हो। सिन्ह्वाले स्थानीय आपतकालीन व्यवस्थापन ब्युरोलाई उद्धृत गर्दै बिहीबार राति आएको भूकम्पको केन्द्रविन्दु नागकु प्रान्तको बाकेन काउन्टीमा रहेको जनाएको छ।
चीनले सन् १९५० को दशकमा तिब्बतलाई गाभेपछि स्वायत्त क्षेत्र घोषणा गरेको छ। बाकेन काउन्टी तिब्बती राजधानी ल्हासाबाट ४०० किलोमिटर उत्तरपूर्वमा अवस्थित छ।
अधिकारीहरुले आपतकालीन अवस्था घोषणा गरेका छन् र प्रभावित क्षेत्रमा उद्धार टोलीहरु खटाएका छन्। जहाँ अन्य ३२ जना घाइते भएका छन्।
स्थानीय खबरहरुका अनुसार प्रभावित क्षेत्रमा विद्युत आपूर्ति अवरुद्ध भएको छ र ३३९ घर ध्वस्त भएका छन्। चट्टान पहिरोले त्यस क्षेत्रमा सडकहरु अवरुद्ध गरेको छ। जसले गर्दा प्रभावित उच्च–उचाइका क्षेत्रहरुमा उद्धार टोलीहरुको पहुँचमा थप बाधा पुगेको छ।
तिब्बती सहरहरु क्वामडो र न्यिंगचीमा पनि शक्तिशाली भूकम्प महसुस गरिएको छ। सामाजिक सञ्जालमा भाइरल भिडियोहरुले गाउँलेहरु अँध्यारोमा भवनहरु खतरनाक रुपमा हल्लिरहेको बेला सडकबाट भागिरहेको देखाएको छ। यद्यपि, यी खबरहरु स्वतन्त्र रुपमा पुष्टि भएका छैनन्।
त्यस क्षेत्रलाई विनाशकारी भूकम्पको जोखिममा रहेको रुपमा पहिचान गरिएको छ। सन् २०२३ मा नजिकैको पहाडी चिनियाँ प्रान्त गान्सुमा ६.२ म्याग्निच्युडको भूकम्प गएको थियो। जसमा १२० भन्दा बढी मानिसको मृत्यु भएको थियो।
हालसालै करिब दुई महिनाभन्दा कम समयअघि हिमनदी भत्किँदा भएको ठूलो बाढी र पहिरोले तिब्बत र नेपालमा विनाश मच्चाएको थियो। जसमा कम्तीमा १ हजार ४०० जनाको मृत्यु भएको थियो। सयौँ अझै बेपत्ता छन्। –एजेन्सी
