काठमाडौं । जेठ दोस्रो र तेस्रो सातामा सुधारिएको निक्षेप अन्तिम सातामा भने जम्मा तीन अर्ब रुपैयाँमै सिमित भएको छ । बाणिज्य बैंकहरुले जेठ २२ गतेदेखि २७ गतेसम्ममा तीन अर्ब रुपैयाँले निक्षेप बढाएकोमा कर्जा लगानी भने २ अर्बले घटेको छ ।
बैंकहरुले जेठ २७ गतेसम्ममा ४३ खर्ब ९३ अर्ब रुपैयाँले निक्षेप संकलन गरी ४१ खर्ब ९४ अर्ब रुपैयाँ कर्जा लगानी गरेका छन् । जेठ महिनामा मात्रै २३ खर्ब रुपैयाँले निक्षेप सुधार भएको छ भने जम्मा २ खर्बले मात्रै कर्जा विस्तार भएको छ ।
निक्षेप संकलनको तुलनामा कर्जा विस्तार नहुँदा सिडी रेसियो ९०.२२ प्रतिशतमा झरेको छ । सिडी रेसियोका कारण बैंकहरुको कर्जा विस्तार ठप्प छ । नेपाल राष्ट्र बैंकले असार मसान्त भित्रमा सिडी रेसियो ९० प्रतिशत झार्न निर्देशन दिइसकेको छ । असार भित्रमा राष्ट्र बैंकले निर्देशन गरेका व्यवस्था कार्यान्वयन नगर्ने बैंकहरुलाई राष्ट्र बैंकले दिने सुविधाबाट बञ्चित गर्ने गभर्नर अधिकारीले घोषणा गरेका छन् । यसले गर्दा बैंकहरुले नयाँ कर्जा प्रवाह नगरी निक्षेप खोजेर बसिरहेका छन् । अहिले बैंकहरुलाई कि त कर्जा उठाउनु पर्ने या त निक्षेप बढाउनु पर्ने दवाव छ ।
