काठमाडौं । हिमालयन डिस्टिलरीले आर्थिक वर्ष २०७९/८० का लागि लाभांश घोषणा गरेको छ।
कम्पनी सञ्चालक समितिको आइतबार (मंसिर १७ गते) बसेको बैठकले उक्त आर्थिक वर्षको मुनाफा तथा सञ्चित मुनाफाबाट हाल कायम चुक्तापुँजीको कुल २५ प्रतिशत लाभांश वितरण गर्ने प्रस्ताव गरेको हो। जसअनुसार १० प्रतिशत बोनस शेयर र प्रतिचुक्ताशेयर १५ रुपैयाँ नगद लाभांश (करसहित) रहेका छन्।
प्रस्तावित लाभांश अनुमोदन गर्न कम्पनीले २३ औँ वार्षिक साधारणसभा आउँदो पुस २५ गते आयोजना गर्ने निर्णय गरेको छ। सभा पर्साको वीरगन्ज–२१ लिपनिविर्तास्थित कम्पनीको रजिस्टर्ड कार्यालयमा बिहान १० बजेबाट सुरु हुनेछ।
सोही सभाले लाभांश अनुमोदन गरेपछि शेयरधनीहरुले पाउनेछन्।
वार्षिक साधारणसभा र लाभांश प्रयोजनार्थ कम्पनीले पुस १३ गते बुक क्लोज गर्ने निर्णय गरेको छ। यसको मतलब पुस १३ गतेअघिसम्म कायम शेयरधनीहरु लाभांश पाउन र सभामा भाग लिन योग्य हुनेछन्।
