काठमाडौं । नेपाल राष्ट्र बैंकले मौद्रिक नीतिमार्फत बैंक तथा वित्तिय संस्थाहरुलाई बीमा अभिकर्ता बन्न नपाउने गरी खारेज गरिदिएपछि बीमा अभिकर्ताहरु भने खुशी देखिएका छन् ।
पेशागत अभिकर्ता संघ नेपालका अध्यक्ष नन्द प्रसाद तिवारीले बैंकले बीमा अभिकर्ताको दुरुपयोग गरेकाले खारेज गर्नु परेको बताए । उनले बीमा अभिकर्ताहरुको गुम्न लागेको रोजगारी फर्कने वातावरण सिर्जना भएको प्रतिक्रिया इन्स्योरेन्स खवरलाई दिएका छन् । बैंकमार्फत बीमा अभिकर्ताको एजेन्सी खारेज गरिएपछि बीमा अभिकर्ताहरुले भने खुशी व्यक्त गरेका छन् । अध्यक्ष तिवारीले देशैभरिका बीमा अभिकर्ताहरु खुशी भएको बताए । उनले भने, ‘हामीले विगत दुई वर्षदेखि नै यो बैंकले सबै काम गर्न हुने तर बीमाको काम गर्न हुँदैन भनेर भनेका हौं ।
बेरोजगारी बढिरहेको सन्दर्भमा रोजगार दिइरहेको बीमा अभिकर्ता पेशा खोसेर भइरहेको राजगारी खोस्ने काम भयो भनेर हाम्रो विरोध थियो, त्यो आज सफल भएको छ । हामीले अर्थसमितिका सभापतिसहितलाई यो अभियान चलायौं । आज त्यसले एउटा स्वरुप ग्रहण गरेर हाम्रो सामू आईपुग्दा देशैभरिका बीमा अभिकर्ता साथीहरु खुशी हुनु भएको छ ।’ तिवारीले उक्त निर्देशिकाको अक्षरस पालना हुनुपर्नेमा जोड दिँदै केही बैंकहरुले अझै पनि बीमा अभिकर्ताको काम गरिरहेको सूचना आएकोले नियमित अनुगमन गर्नुपर्ने समेत बताएका छन् ।
अध्यक्ष तिवारीले बैंकमार्फत गरिने बीमाका कारण विकृति फैलदै गएको समेत बताए । व्यक्तिको आम्दानी, खर्चको विश्लेषण गर्न व्यक्तीको कार्यक्षेत्रमै पुगेर जसरी बीमा अभिकर्ताले दुःख गरेको हुन्छ, बैंकको काउन्टरमा बसेर गरिएको बीमा भरपर्दौ नहुन पनि सक्ने औल्याए ।
अध्यक्ष तिवारीले भने, बीमा अभिकर्ताले आम्दानी खर्चको मोटामोटी सर्भे गरेर प्रतिवेदन बनाएर बीमा गर्नुपर्ने हुन्छ । बैंकका कर्मचारीहरुले आफ्नो अड्डामा बसेर काम गरेका हुन्छन्, कसरी बास्तविक फिगर आउँछ ?’ राष्ट्र बैंकले बैंकहरुको बीमा अभिकर्ता एजेन्सी खारेज गरेर बीमा र बैंकिङ दुवै क्षेत्रलाई फाइदा मिल्ने अध्यक्ष तिवारी बताउँछन् ।
