काठमाडौं । नेपालबाट फिर्ता जानेसम्मको तयारी गरेको धादिङको मलेखुमा निर्माणाधिन हुवासिन सिमेन्टले बीमा नगर्दा करोडौं क्षति व्यहोरेको र सोही क्षतिको कारण लगानी फिर्ता गर्नुपर्ने अवस्था सिर्जना भएको खुलासा भएको छ ।
हुवासिन सिमेन्टले चिनियाँ लगानीको मेगा प्रोजेक्ट हो । कम्पनीले धादिङको मलेखुमा निर्माण गरेको करोडौं मूल्यका भौतिक संरचनाहरु गत असार अन्तिम साता आएको बाढीले बगाएको थियो । बीमा नगरेका कारण सो संरचना बगाएर भएको क्षति लगानीकर्ता आफैले व्यहोर्नु परेपछि तनाव उत्पन्न भई लगानी नै फिर्ता लैजानेसम्मको अवस्थामा पुगेकोमा अहिले पुनः सो सिमेन्टले काम सुरु गर्न लागेको छ ।
कम्पनीले निर्माण गर्ने कम्पनी परिवर्तन गरी पुनः भौतिक संरचना निर्माण सुरु गर्न लागेको धादिङबाट पत्रकार रमेश आचार्यले इन्स्योरेन्स खवरलाई जानकारी दिए ।
यसअघि हुवासिन सिमेन्टको भौतिक संरचनाको निर्माणको जिम्मा पाएको हान्दान सिनोमा नामको निर्माण कम्पनीले चीन र नेपाल दुबैतर्फ बीमा नगरी काम गरेको खुलेको छ । बीमा नगरेका कारण बाढीले बगाएको भौतिक संरचनाको भुक्तानी गर्न कम्पनीले नमानेपछि विवाद भएको खुलेको छ । सन् २०१९ भत्रै निर्माण सम्पन्न गर्ने गरि तीब्र गतिमा काम गरिरहेको कम्पनीले बाढीको समस्या व्योहोरेपछि लगानी नै फिर्ता लैजानेसम्मको हल्ला चलेको थियो । अहिले लगानीकर्ता कम्पनीले पुनः अर्को कम्पनीलाई उद्योग निर्माणको जिम्मेवारी दिएको छ ।
धादिङको बेनिघाट रोराङ गाउँपालिकामा नेपालकै सबैभन्दा ठूलो लगानी करिब १५ अर्ब रुपैयाँमा स्थापना हुवासिन सिमेन्ट उद्योग स्थापना गर्न लागिएको छ । दैनिक ६० हजार बोरा उत्पादन क्षमताको सो सिमेन्ट उद्योग नेपालकै ठूलो हुने जनाइएको छ ।
