काठमाडौं । अटो उत्पादक कम्पनी हुन्डाईले आफ्नो नयाँ कार विश्वस्तरमा सार्वजनिक गरेको छ। कम्पनीले हुन्डाई आयोनिक ९ को फोटो टिजर सार्वजनिक गरेको हो।
यो कार अर्को महिना नोभेम्बरमा लन्च हुनेछ र कम्पनीले भर्खर यस कारका केही तस्बिर शेअर गरेको छ। यो कम्पनीको नयाँ स्पोर्ट्स युटिलिटी कार हुनेछ। जुन अर्को महिना विश्वव्यापी रुपमा लन्च हुनेछ।
हुन्डाई मोटर्सले आफ्नो आगामी खेलकुद उपयोगिता कार, अल–इलेक्ट्रिक आयोनिक ९ को फोटो टिजर जारी गरेको छ। यो कार टिजरमा धेरै आकर्षक देखिएको छ।
यो उत्कृष्ट इलेक्ट्रिक एसयूभी कारको टिजरमा उत्कृष्ट मोडल र कारको सुन्दर डिजाइन देखाइएको छ। समाचार एजेन्सी योनहापका अनुसार हुन्डाइले आयोनिक ९ का लागि समुद्री यात्रा गर्ने डुंगाबाट प्रेरणा लिएको जनाएको छ। जसको बाहिरी भाग आकर्षक र भित्री भाग आरामदायी हुनेछ।
आयोनिक ९ हुन्डाई मोटरको आयोनिक लाइनअपको सबैभन्दा ठूलो कार श्रेणीको हिस्सा हो। कम्पनीले यो कारमार्फत ठूला इलेक्ट्रिक एसयूभी मोडलको विश्वमा ठूलो दाउ खेल्न लागेको छ।
हुन्डाईले आगामी महिना हुने ग्लोबल शोकेस कार्यक्रममा आयोनिक ९ को डिजाइन र फिचरहरु पूर्ण रुपमा अनावरण गर्ने योजना बनाएको छ।
