काठमाडौं । अर्थमन्त्री विष्णु पौडेलले अटो व्यवसायले राजस्वमा महत्वपूर्ण योगदान पुर्याएको बताएका छन्।
नाडा अटोमोबाइल्स एसोसिएसन अफ नेपालको आयोजनामा आजबाट सुरु भएको ‘नाडा अटो शो–२०२४’ को उद्घाटन गर्दै अर्थमन्त्री पौडेलले यस्तो धारणा राखेका हुन्। ‘अटो व्यवसाय राजस्वमा योगदान गर्ने एउटा महत्वपूर्ण क्षेत्र हो, यसलाई मैले विशेष रुपले लिएको छु’, उनले भने।
चालु आर्थिक वर्षको मौद्रिक नीतिले अटो क्षेत्रका नीति व्यवस्था समेटे पनि विस्तारै समयअनुसार सरकारले सुधार गर्दै जाने अर्थमन्त्री पौडेलले बताए। ‘विद्युतीय सवारीको साधनको हकमा सरकारले चाँडै नै उचित नीति लिनेछ’, उनले भने।
अटो क्षेत्रका लागि नीतिगत सुधारसहित अघि बढने अहिलेको सरकारको योजना रहेको पौडेलले बताए। ‘अब सवारीसाधन बेच्नेमात्र होइन, अब उत्पादनतर्फ पनि लाग्नुपर्छ’, उनले भने, ‘यसमा राज्यले साथ दिन्छ।’
