काठमाडौं । सांग्रिला डेभलपमेन्ट बैंकको शेयरमूल्य समायोजन गरिएको छ।
नेपाल स्टक एक्सचेन्ज (नेप्से)ले बोनस शेयरका लागि सांग्रिला डेभलपमेन्ट बैंकको शेयरमूल्य समायोजन गर्दै प्रतिकित्ता ३८६.४८ रुपैयाँ कायम गरेको छ। आजको अन्तिम कारोबार मूल्यअनुसार प्रतिकित्ता ४०५.८० रुपैयाँ थियो। अब भोलि समायोजित मूल्यअनुसार यो बैंकको शेयर कारोबारमा आउनेछ।
लाभांश र साधारणसभा प्रयोजनार्थ बैंकले भोलि मंसिर २३ गतेदेखि पुस ७ गतेसम्म बुक क्लोज गर्ने निर्णय गरेको छ। यसको अर्थ आज मंसिर २२ गतेसम्म कायम शेयरधनीहरुमात्रै यो बैंकको लाभांश पाउन र सभा भाग लिन योग्य भएका छन्।
बैंकले आफ्नो २१ औँ वार्षिक साधारणसभा आउँदो पुस ७ गते आयोजना गर्ने निर्णय गरेको छ। सभा काठमाडौंको कालिकास्थानस्थित अमृतभोग क्याटरर्समा बिहान साढे १० बजेबाट सुरु हुनेछ।
सभाले गत आर्थिक वर्ष २०८१।८२ का लागि प्रस्तावित हाल कायम चुक्तापुँजीको कुल १०.३५८३ प्रतिशत लाभांश अनुमोदन गर्नेछ। जसमा ५ प्रतिशत बोनस शेयर र कर प्रयोजनार्थ ५.३५८३ प्रतिशत नगद लाभांश (करसहित) छन्।
बोनस शेयर वितरणपछि हाय कामय जारी र चुक्तापुँजी वृद्धि हुने भएकोले सोहीबमोजिम नियमावली र प्रबन्धपत्रमा संशोधन गर्ने विशेष प्रस्ताव सभाले पारित गर्नेछ। सभाले सञ्चालकहरुले विभिन्न खर्चबापत पाउने रकम वृद्धि गर्ने प्रस्ताव पनि अनुमोदन गर्नेछ।
सभाले अन्य उपयुक्त बैंक तथा वित्तीय गाभ्ने, गाभिने र प्राप्ति प्रक्रिया अगाडि बढाउन उपयुक्त देखिएमा सोहीबमोजिम सबै काम अगाडि बढाउन सञ्चालक समितिलाई अख्तियारी प्रदान गर्ने विशेष प्रस्ताव पारित गर्नेछ।
सभाले गत आर्थिक वर्षको वार्षिक तथा लेखापरीक्षकको प्रतिवेदन स्वीकृत गर्नुका साथै चालु आर्थिक वर्ष २०८२।८३ का लागि लेखापरीक्षकको नियुक्ति र निजको पारिश्रमिक निर्धारणसम्बन्धी प्रस्ताव स्वीकृत गर्नेछ।
