काठमाडौं । रिलायन्स स्पिनिङ्ग मिल्स शेयर बजारमा सूचीकृत उत्पादन तथा प्रशोधन समूहअन्तर्गत सबैभन्दा ठूलो कम्पनी बनेको छ ।
पछिल्लो तथ्यांक अनुसार कम्पनीको बजार पुँजीकरण उत्पादन तथा प्रशोधन समूहअन्तर्गत सबैभन्दा धेरै रहेको छ । कम्पनीको हालको बजार पुँजीकरण ६१ अर्ब ६० करोड रहेको छ । दोश्रोमा सर्वोत्तम सिमेन्टको पुँजीकरण ४४ अर्ब ७४ करोड रुपैयाँ रहेको छ भने तेश्रोमा हिमालयन डिष्टीलरीको पुँजीकरण ४३ अर्ब १४ करोड रहेको छ ।
८०० रुपैयाँ माथि आईपिओ निष्काशन गरेको कम्पनीको पहिलो कारोबार रेञ्ज भने १०० रुपैयाँ देखि ३०० रुपैयाँसम्म पाएको थियो । आईपिओका लगानीकर्ताले आफ्नी लगानी उठाउन पनि धेरै समय कुर्नु परेकोमा अहिले भने कम्पनीको बजार मूल्य ३ हजार २०० माथि पुगेको छ ।
बजारमा सूचीकृत कम्पनीहरूको शेयर मूल्यमा हुने उतार–चढावसँगै तिनको कुल बजार मूल्य अर्थात् बजार पुँजीकरण परिवर्तन हुन्छ र यही परिवर्तनले नेप्से सूचकांकलाई प्रत्यक्ष रूपमा असर पार्छ । जब ठूला पुँजीकरण भएका कम्पनीहरूको सेयर मूल्य बढ्छ वा घट्छ , तिनको उच्च बजार पुँजीकरणका कारण नेप्से सूचकांकमा अरुको भन्दा धेरै प्रभाव पार्छ । साना पुँजीकरण भएका कम्पनीहरूको मूल्य परिवर्तनले भने तुलनात्मक रूपमा कम प्रभाव पार्ने गरेको हुन्छ ।
