काठमाडौं। अर्थमन्त्री डा स्वर्णिम वाग्लेले भारत भ्रमणको दोस्रो दिन आज महत्वपूर्ण कूटनीतिक र द्विपक्षीय भेटघाट गर्दै छन्।
तीनदिने भ्रमणका लागि अर्थमन्त्री वाग्ले बिहीबार भारत प्रस्थान गरेका थिए। बिहीबार नै उनले भारतीय समकक्षी निर्मला सीतारमणसँग द्विपक्षीय भेटघाट गरेका थिए।
भ्रमणको दोस्रो दिन अर्थमन्त्री वाग्ले आज शुक्रबार विभिन्न कार्यक्रममा सहभागी हुँदैछन्। आज बिहान ९ बजे उनी पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवाद कार्यक्रममा प्रमुख अतिथिका रुपमा सहभागी हुँदैछन्। इन्डिया इन्टरनेसनल सेन्टरमा आयोजना हुने उच्चस्तरीय कूटनीतिक संवादमा उनले प्रमुख अतिथिका रुपमा सहभागी भएर आफ्नो विचार राख्नेछन्।
आजै अर्थमन्त्री वाग्लेले भारतीय विदेशमन्त्री डा एस. जयशंकरसँग भेटवार्ता गर्ने कार्यक्रम छ। भेटवार्ताको समय साँझ ५ बजेका लागि निर्धारण गरिएको छ।
आजै वाग्लेले भारत व्यापार संवर्धन संगठनका अध्यक्ष जावेद अशरफले आयोजना गर्ने बृहत् भेटघाट कार्यक्रममा सहभागी हुने छन्। भारत मण्डपममा आयोजना हुने कार्यक्रममा नेपाल–भारत आर्थिक सहकार्यका विभिन्न आयामबारे बृहत् र उच्चस्तरीय छलफल हुनेछ।
अर्थमन्त्री वाग्लेको उच्चस्तरीय तीनदिने भारत भ्रमणमा अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नेपाली दूतावास नयाँदिल्लीका उपनियोग प्रमुख डा सुरेन्द्र थापा, इकोनोमिक मिनिस्टर तारानाथ अधिकारी र अर्थमन्त्रीका निजी उपसचिव कञ्चन बस्नेत सहभागी छन्। भ्रमणको तेस्रो दिन शनिबार निजी क्षेत्र र अन्य उच्चस्तरीय भेटघाट गरेर अर्थमन्त्री नेतृत्वको प्रतिनिधिमण्डल नेपाल फर्किने कार्यक्रम छ।
