काठमाडौं: बीमा प्राधिकरणका सञ्चालक तथा कर्मचारीको नातेदारलाई बीमा कम्पनीमा जागिर खान नपाउँने व्यवस्था गर्न बीमा अभिकर्ताले माग गरेका छन् । बीमा कम्पनीमा जागिर खाने कर्मचारीका आफन्तले कम्पनीमा काम भन्दा पनि बढी आराम गर्ने भएपछि अभिकर्ताले यस्तो माग गरेका हुन् । साथै आफन्तले जागिर खाएका कम्पनीको समितिले पारदर्शी रुपले अनुगमन गर्न नसकेको अभिकर्ताहरुले दाबी गरेका छन् ।
संसदमा प्रस्तुत भएको बीमा विद्येयकको दफा ५७ मा बीमकसँग वित्तिय स्वार्थ भएको व्यक्तिले कम्पनीमा जागिर खान नपाउँने व्यवस्था गरिएको छ । अभिकर्ताहरुले सोही दफामा प्राधिकरणका सञ्चालक र आफन्तले पनि जागिर खान नपाउँने व्यवस्था गर्न माग गरेका छन् ।
बीमा कम्पनी समितिका निर्देशक देखि ड्राईभरसम्मका आफन्तका भर्ती केन्द्र
अधिकांश कम्पनीमा बीमा समितिका कर्मचारीका आफन्तले भरिएका छन् । त्यसमा पनि नयाँ कम्पनी खोलिएपछि आफन्तलाई भर्ती गराउँने केन्द्र नै बनेको समितिका एक कर्मचारीले बताए । उनका अनुसार समितिका निर्देशक देखि लिएर ड्राईभरसम्मका आफन्त कम्पनीमा नियुक्त भएका छन् । उनीहरुले आफना श्रीमती, छोरा, छोरी, भाई, बहिनी देखि लिएर मित छोरा,छोरीलाई सम्म जागिर लगाउँन भ्याएको बताउँछन् ।
शिखर इन्स्योरेन्स र नेपाल लाइफ इन्स्योरेन्समा धेरै छन् समितिका कर्मचारीका आफन्त
निर्जीवन बीमा कम्पनीमा शिखर इन्स्योरेन्स कम्पनी र जीबन बीमा कम्पनीमा नेपाल लाइफ इन्स्योरेन्स कम्पनीमा समितिका कर्मचारीका नातेदार भर्ती भएको एक कम्पनीका कर्मचारीले बताए । उनका अनुसार त्यसैले यि कम्पनीको समितिमा राम्रो प्रभाव रहेको छ ।
यस्ता कर्मचारीले गर्लान् उचित अनुगमन ?
आफनै श्रीमती, छोरा, छोरीले जागिर खाएका कम्पनीमा अनुगमन गर्न गएका समितिका कर्मचारीले नियम संगत नियमन गर्लान् त भन्ने प्रश्न देखिन थालेको छ । कम्पनीमा नातेदार भएकै कारण कति कम्पनीले छुट पाउँने गरेको समिति स्रोतले बताएको छ । तसर्थ प्राधिकरणका सञ्चालक र कर्मचारीका आफन्तले कम्पनीमा जागिर खान रोक लगाउँने व्यवस्था ऐनमा नै गर्न अभिकर्ताले माग गरेका छन् ।
