काठमाडौं । श्री इन्भेष्टमेन्ट फाइनान्स कम्पनीको १३ प्रतिशत लाभांश सुरक्षित गर्ने आज अन्तिम दिन रहेको छ । पुस ११ गते साधारण सभा बोलाएको यस कम्पनीले भोलि मंगलबारबाट सभा हुने दिनसम्म बुक क्लोज गर्दैछ । त्यसकारण आज सोमबारसम्म कायम सेयरधनीले मात्र लाभांश सुरक्षित गर्न सक्नेछन् ।
कम्पनीले आर्थिक वर्ष २०७५/७६ को नाफाबाट २ दशमलव ३५ प्रतिशत बोनस सेयर र १० दशमलव ६५ प्रतिशत नगद गरी कुल १३ प्रतिशत लाभांश लाभांश दिन लागेको हो । सभा आम्रपाली ब्यांकेट भाटभटेनी, काठमाडौंमा बिहान १० बजे सुरु हुनेछ ।
सभामा कुनै वित्तीय संस्थाहरु गाभ्न र गाभिन परेमा त्यसको सम्पूर्ण अख्तियारी सञ्चालक समितिलाई दिने प्रस्ताव पनि रहनेछ । आर्थिक वर्ष २०७५/७६ को वासलात, नाफा–नोक्सान र नगद प्रवाहमाथि छलफल गर्ने प्रस्ताव रहेको छ ।
त्यस्तै, आर्थिक वर्ष २०७६/७७ को लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा छन् ।
हाल कम्पनीको चुक्ता पूँजी ८१ करोड रुपैयाँ छ । बोनस सेयरपछि पुँजी ८२ करोड ९० लाख ३५ हजार रुपैयाँ पुग्नेछ ।
