काठमाडौं । नेपाल राष्ट्र बैंकले जारी गरेको मौद्रिक नीति र सोही मौद्रिक नीति अनुसार जारी गरिएको निर्देशिकाका कारण बैंकिङ क्षेत्रलाई अप्ठेरो परेको भन्दै २८ वटै बाणिज्य बैंकहरु आन्दोलनमा उत्रिएका छन् । बाणिज्य बैंकहरुको छाता संगवठन नेपाल बैंकर्स एशोसिएशनले शुक्रबार राष्ट्र बैंकमा आफ्नो ज्ञापनपत्र औपचारिक रुपमा बुझाएर आन्दोलनमा उत्रिएको हो ।
मौद्रिक नीतिलाई कार्यान्वयन गर्न जारी गरिएको निर्देशनहरु मध्ये स्प्रेड दरको गणना विधि र पुँजिकोष गणना विधि सच्याउनु पर्ने तथा बैंकास्योरेन्सको काम गर्न नपाउने व्यवस्था फिर्ता लिनुपर्ने बैंकरहरुको माग छ । बैंकर्स संघको तर्फबाट केन्द्रीय बैंकमा गभर्नर डा. चिरञ्जिवी नेपाल, डेपुटी गभर्नर र विभागीय प्रमुखहरुलाई संयुक्त रुपमा बुझाइएको ज्ञापनपत्रमा आफ्ना मागहरुका सम्बन्धमा केन्द्रीय बैंकको ध्यानाकर्षण गराइएको छ ।
स्रोतका अनुसार लिखित रुपमा तीन वटा निर्देशिका भएपनि अलिखित माग पनि बैंकरहरुले अघि सारेका छन् । जस अनुसार बैंकका सिईओ तथा सञ्चालकहरुको उमेरको हदबन्दी तोक्ने कार्य समेत फिर्ता लिन उनीहरुले माग गरेका छन् ।
