काठमाडौं । सिटिजन लाइफ इन्स्योरेन्सले गत सोमबार देखि बुटवलमा आफ्नो क्षेत्रिय शाखा कार्यालय खोलेको छ । बुटवल क्षेत्रका मानिसहरुलाई इन्स्योरेन्स सम्बन्धि सेवा सुविधा र इन्स्योरेन्सको योजनाहरु कार्यान्वयन गर्ने उद्देश्यले सिटिजन लाईफ इन्स्योरेन्सले आफ्नो क्षेत्रिय शाखा कार्यालय खोलेको हो । उक्त क्षेत्रिय कार्यालयको उद्घाटन कम्पनीका ब्राण्ड एम्बेस्डर “मह जोडी” मदन कृष्ण श्रेष्ठ तथा हरिवंश आचार्य गरेका हुन् ।
क्षेत्रिय कार्यालय संचालन पश्चात यस क्षेत्रका जनमानसमा बीमाको पहुँच अभिवृद्धि गर्नमा सहयोग पुग्ने कम्पनीको विश्वास रहेको छ । हाल कम्पनीले अधिराज्यभर ३४ शाखा कार्यालयहरु तथा ४ वटा वैदेशिक रोजगार जीवन बीमा सेवा केन्द्रहरु मार्फत ग्राहकहरुलाई जीवनबीमा सेवा प्रदान गर्दै आएको छ। सिटिजन लाइफले संचालनमा आएको ६ महिनामा ५ करोड १४ लाख रुपैयाँ खुद नाफा गरेको छ। कम्पनीले यही अवधिमा १५ हजार ५७ वटा बीमालेख बिक्री गरि ७ करोड ६१ लाख रुपैयाँ बीमा शुल्क आर्जन गरेको छ।
सिटिजन लाइफ इन्स्योरेन्सको प्रमुख कार्यकारी अधिकृतमा पोषकराज पौडेल हुनुहुन्छ भने अध्यक्ष, नेपाल उद्योग वाणिज्य महासंघका पूर्व अध्यक्ष प्रदीपजंग पाण्डे हुनुहुन्छ ।
कम्पनीको चुक्ता पूँजी एक अर्ब ७५ करोड रुपैयाँ रहेको छ भने जगेडा कोषमा ५ करोड ७० लाख रुपैयाँ जम्मा भएको छ। हाल कम्पनीको अधिकृत पुँजी ३ अर्ब रुपैयाँ र जारी पुँजी २ अर्ब ५० करोड रुपैयाँ रहेको छ । त्यस्तै, कम्पनीको चुक्ता पुँजी १ अर्ब ७५ करोड रुपैयाँ रहेको छ । यस कम्पनीले निकट भविष्यमा ७५ करोड रुपैयाँको सर्वसाधारणको लागी सेयर जारी गरी चुक्ता पुँजी २ अर्ब ५० करोड रुपैयाँ पुर्याउने जनाएको छ ।
