काठमाडौं । जीवन बीमकको नयाँ व्यापार (वैदेशिक रोजगार बीमाशुल्कबाहेक) साढे २६ प्रतिशतले बढेको छ। नेपाल बीमा प्राधिकरणले सार्वजनिक गरेको चालु आर्थिक वर्ष २०८२।८३ को प्रथम त्रैमास (साउन–असोज)सम्मको तथ्यांकले यस्तो देखाएको हो। हाल सञ्चालनमा रहेका १४ वटा जीवन बीमा कम्पनीले चालु वर्षको असोजसम्म ९ अर्ब ५४ करोड ९ लाख रुपैयाँ प्रथम बीमाशुल्क (नयाँ व्यापार) संकलन गरेका छन्। अघिल्लो वर्ष २०८१।८२ को असोजसम्म कम्पनीहरुले ७ अर्ब ५३ करोड ९५ लाख रुपैयाँ प्रथम बीमाशुल्क संकलन गरेका थिए। अघिल्लो वर्षको तुलनामा समीक्षा अवधिमा बीमकहरुको नयाँ व्यापार २६.५५ प्रतिशतले बढेको छ।
समीक्षा अवधिसम्म सर्वाधिक नयाँ व्यापार भित्र्याउनेमा नेपाल लाइफ रहेको छ भने वृद्धिदरका हिसाबले आइएमई लाइफ अगाडि रहेको छ। नयाँ व्यापार १२ वटा कम्पनीको बढेको छ भने २ वटाको घटेको छ।
चालु वर्षको असोजसम्म नेपाल लाइफले २ अर्ब ७० करोड ७९ लाख रुपैयाँ प्रथम बीमाशुल्क संकलन गरेको छ। अघिल्लो वर्ष यही अवधिसम्म कम्पनीले १ अर्ब ९० करोड ४ लाख रुपैयाँ प्रथम बीमाशुल्क संकलन गरेको थियो। अघिल्लो वर्षको तुलनामा समीक्षा अवधिमा कम्पनीको नयाँ व्यापार ४२.४९ प्रतिशतले बढेको छ।
दोस्रोमा नेसनल लाइफ रहेको छ। समीक्षा अवधिसम्म कम्पनीले १ अर्ब ३१ करोड ६९ लाख रुपैयाँ प्रथम बीमाशुल्क संकलन गरेको छ। अघिल्लो वर्ष यही अवधिसम्मको तुलनामा समीक्षा अवधिमा कम्पनीको नयाँ व्यापार २८.७२ प्रतिशतले बढेको छ। अघिल्लो वर्ष असोजसम्म कम्पनीले १ अर्ब १० करोड ९२ लाख रुपैयाँ प्रथम बीमाशुल्क संकलन गरेको थियो।
धेरै नयाँ व्यापार भित्र्याउने तेस्रो कम्पनीमा लाइफ इन्स्योरेन्स कर्पोरेसन नेपाल (एलआईसी नेपाल) रहेको छ। यो कम्पनीले अघिल्लो वर्ष असोजसम्म ५१ करोड ६६ लाख रुपैयाँ प्रथम बीमाशुल्क संकलन गरेकोमा समीक्षा अवधिसम्म ३१.५२ प्रतिशतले बढेर ६७ करोड ९४ लाख रुपैयाँ पुगेको छ।
यसैगरी समीक्षा अवधिसम्म सूर्यज्योति लाइफले ६१ करोड ३२ लाख रुपैयाँ, सिटिजन लाइफले ५९ करोड ८२ लाख रुपैयाँ र हिमालयन लाइफले ५४ करोड ६६ लाख रुपैयाँबराबरको नयाँ व्यापार भित्र्याएका छन्। अघिल्लो वर्षको तुलनामा समीक्षा अवधिमा सूर्यज्योति लाइफको नयाँ व्यापार ५.०३ प्रतिशत र सिटिजन लाइफको ३४.३९ प्रतिशतले बढेको छ भने हिमालयन लाइफको ८.४३ प्रतिशतले घटेको छ।
चालु वर्षको असोजसम्म एसियन लाइफले ४५ करोड ७९ लाख रुपैयाँ, राष्ट्रिय जीवन बीमा कम्पनीले ४५ करोड ४६ लाख रुपैयाँ, सानिमा रिलायन्स लाइफले ४३ करोड ६८ लाख रुपैयाँ, आइएमई लाइफले ४२ करोड ४७ लाख रुपैयाँ, रिलायबल नेपाल लाइफले ४० करोड ८७ लाख रुपैयाँ, मेट लाइफले ३७ करोड ७६ लाख रुपैयाँ, प्रभु महालक्ष्मी लाइफले ३२ करोड ५ लाख रुपैयाँ र सन नेपाल लाइफले १९ करोड ७४ लाख रुपैयाँ प्रथम बीमाशुल्क संकलन गरेका छन्। अघिल्लो वर्षको तुलनामा समीक्षा अवधिमा एसियन लाइफको नयाँ व्यापार २९.९८ प्रतिशत, राष्ट्रिय जीवन बीमा कम्पनीको २७.१८ प्रतिशत, सानिमा रिलायन्स लाइफको २७.८५ प्रतिशत, आइएमई लाइफको ७०.६५ प्रतिशत, रिलायबल नेपाल लाइफको ३८.२६ प्रतिशत, मेट लाइफको १७.१२ प्रतिशत र प्रभु महालक्ष्मी लाइफको २२.५१ प्रतिशतले बढेको छ भने सन नेपाल लाइफको ४.६९ प्रतिशतले घटेको छ।
