काठमाडौं । एफपीओको कर विवादमा बैंक र बीमा कम्पनीहरुले सर्वोच्च अदालतमा दायर गरेको रिटमा आज बुधबार बहस हुँदैछ।
सर्वोच्च अदालतको संवैधानिक इजलाशमा १६ वटा वाणिज्य बैंक तथा २ बीमा कम्पनीले एफपीओको कर विषयका विषयमा दायर रिटमा बहस हुने भएको हो। प्रधानन्यायधीश विश्वम्भरप्रसाद श्रेष्ठ र न्यायधीशहरु ईश्वरप्रसाद खतिवडा, आनन्दमोहन भट्टराई, प्रकाशमान सिंह राउत र सपना प्रधान मल्लको संवैधानिक इजलाशमा यो मुद्दाको बहस हुनेछ।
चालु आर्थिक वर्ष २०८०/८१ को आर्थिक विधेयकमा आएको एफपीओ र मर्जरको आयमा कर व्यवस्था बदरको माग गर्दै १६ वटा वाणिज्य बैंकले सर्वोच्च अदालतमा संयुक्त रिट दायर गरेका छन्।
यसैगरी प्रिमियममा एफपीओ निष्कासन गरेका नेपाल लाइफ इन्स्योरेन्स र शिखर इन्स्योरेन्सले पनि सर्वोच्च अदालतमा मुद्दा दायर गरेका छन्। सर्वोच्चले बैंक र इन्स्योरेन्सले दायर गरेको दुवै मुद्दालाई एकै ठाउँमा सुनुवाइ गरिरहेको छ।
यसअघि गत असोज १७ गते सर्वोच्चले यो मुद्दामा कारण देखाउ आदेश जारी गरेको थियो। त्यसपछि यो मुद्दा हेर्दाहेर्दैमै रहेको थियो।
