काठमाडौं । कर्णाली प्रदेशको जाजरकोट र रुकुम पश्चिममा गएको भूकम्पमा परी ज्यान गुमाएका व्यक्तिको परिवारले प्राकृतिक प्रकोप बीमा दाबीवापत २ लाख रुपैयाँ राहत पाउने भएका छन् । कर्णाली प्रदेश सरकारले कर्णाली प्रदेश भरका सबै बासिन्दाको प्राकृतिक प्रकोप बीमा गरिदिएकाले मृतकको परिवारले मृत्यु हुनेको संख्याको आधारमा २ लाख रुपैयाँका दरले बीमा क्षतिपूर्ती पाउने भएका हुन्।
सरकारी निर्जीवन बीमक राष्ट्रिय बीमा कम्पनीमार्फत् कर्णाली प्रदेश सरकारले प्रदेशका प्रत्येक बासिन्दाको निःशुल्क प्राकृतिक प्रकोप बीमा गरिदिएको थियो । प्रति व्यक्ति २ लाख रुपैयाँ बीमांकका दरले प्राकृतिक प्रकोप बीमा गरिएको थियो।
निर्जीवन बीमक राष्ट्रिय बीमा कम्पनीका प्रमुख कार्यकारी अधिकृत शेखर बरालले प्रदेश सरकारले गरिदिएको बीमा बहालै रहेकाले मृतकका परिवारले क्षतिपूर्ती पाउने बताए । उनले भने, मृतकका परिवारजनलाई सक्दो सीमित कागजपत्रका आधारमै भएपनि प्रकृयागत झण्झट रहित दाबी भुक्तानी गर्ने तयारी गरिरहेका छाैं, सक्दो चाँडो क्षतिपूर्तीवापतको रकम वितरण गर्नेछाैं।
