काठमाडौं । मल्टीपर्पस फाइनान्स लिमिटेडले आज असोज २९ गतेदेखि हकप्रदमा अवितरित शेयर लिलाम गर्ने भएको छ। कम्पनीले हकप्रद निष्काशन गर्दा बिक्रि नभएको सर्बसाधारण समुहतर्फको ६० हजार ६ सय ५० कित्ता र सस्थापक समुहको ८२ हजार १ सय २३ कित्ता गरि कुल १ लाख ४२ हजार ७ सय ७३ कित्ता शेयर लिलाम गर्न लागेको हो ।
आवेदन दिंदा सर्वसाधारण समुहतर्फ न्युनतम १०० कित्ता र संस्थापक समुहतर्फ न्युनतम १००० कित्ताको लागि आवेदन दिनु पर्ने छ। अधिकतममा भने पुरै कित्ताका लागि दिन सकिने छ । उक्त लिलामीको शेयरमा कार्तिक १३ गतेसम्म आवेदन दिन सकिने जनाएको छ । शेयर लिलाम प्रकियाको लागि मुक्तिनाथ क्यापिटल बिक्री प्रबन्धक रहेको छ ।
कम्पनीले भदौ १० गतेदेखि भदौ ३१ गतेसम्म १ः०।३५ को अनुपातमा अर्थात हाल कायम चुक्ता पुँजीको ३५ प्रतिशत हकप्रद निष्काशन गरेको थियो। उक्त समयमा बिक्री नभएको शेयर लिलाम गर्न लागेको हो ।
लिलामीको शेयरमा मुक्तिनाथ क्यापिटलको कार्यालय नक्साल साथै मुक्तिनाथ विकास बैंकका शाखाहरु थिमी, कुमारीपाटी, विराटनगर, बिरगंज, बिर्तामोड, जनकपुर, हेटौडा, नारायणगढ, पोखरा, बाग्लुंग, बुटवल, घोराही , नेपालगंज, सुर्खेत, धनगढी र महेन्द्रनगर शाखाबाट आवेदन दिन सकिने छ । त्यस्तै फाइनान्सको जनकपुर स्थित कार्यालयबाट पनि आवेदन दिन सकिने छ ।
हाल कायम संस्थापकले मात्र आवेदन दिन सक्ने छन् । कम्पनीको शेयरको मूल्य न्युनतम एक सय रुपैयाँ कायम गरिएकोले सो भन्दा बढी रकम कबुल गरि आवेदन दिनु पर्ने छ। ५ लाख भन्दा बढीको आवेदन दिनेलाई प्यान नम्बर अनिवार्य गरिएको छ । सबैभन्दा उच्च मूल्य कबुल गर्नेले पहिला शेयर पाउने छ र त्यसपछि दोस्रो बढी मूल्य कबुल गर्नेले शेयर पाउने छ । शेयर संख्या कायम रहंदासम्म यहि प्रक्रियाबाट शेयर बाँडफाँड हुने छ ।
