काठमाडौं । दसैंका लागि सर्वसाधारणले नयाँ नोट घटस्थापना बिदाको भोलिपल्ट अर्थात असोज २९ बाट साट्न पाउने भएका छन् । घटस्थापना बिदाको भोलिपल्टबाट नोट साट्नको लागि दुई तीन दिन अगाडिदेखि बैंकहरुले राष्ट्र बैंकबाट नयाँ नोट पाउने राष्ट्र बैंकले जनाएको छ । एक जनाले साना ठूला सबै गरेर अधिकतम १८ हजार ५०० रुपैयाँका दरले नयाँ नोट साट्ने व्यवस्था गरिएको राष्ट्र बैंकको भनाई छ । ५, १०, २०, ५० र १०० रुपैयाँ दरका बन्डलले १८ हजार ५०० रुपैयाँ नै उपलब्ध हुनेछ ।
दशैं, तिहार र छठलाई लक्ष्य गरी घटस्थापनाको भोलिपल्टदेखि नयाँ नोट सटही सुविधा उपलब्ध हुने राष्ट्र बैंकले जनाएको छ । राष्ट्र बैंकले आफ्ना कार्यालय मार्फत सर्वसाधारण र बैंक तथा वित्तीय संस्थालाई नयाँ नोट वितरण गर्नेछ । बैंक तथा वित्तिय संस्थाहरुले तोकिएको समयमा तोकिएको मुख्य तथा शाखाहरुबाट सर्वसाधरणलाई सटही सुविधा दिनेछन् ।
