काठमाडौं । ५ वटा लघु वित्त वित्तीय संस्थाले प्रिमियममा आइपिओ निष्काशनका लागि नेपाल धितोपत्र बोर्डमा निवेदन दिएका छन् । किसान लघुवित्त वित्तीय संस्था, मिर्मिरे लघुवित्त वित्तीय संस्था, उन्नती सहकार्य लघुवित्त वित्तीय संस्था, समता घरेलु लघुवित्त वित्तीय संस्था र नयाँ सारथी लघुवित्त वित्तीय संस्थाले ५ लाख ११ हजार ३९५ कित्ता शेयर प्रिमियममा एफपिओ जारी गर्ने भएका हुन् ।
मर्जर पछि संस्थापक र सर्वसाधारण शेयर स्वामित्वको अनुपात मिलाउन एफपिओ निष्काशन गर्न थालेका हुन् । किसानले १२ लाख ९८ हजार २५९ कित्ता शेयर १२५ रुपैयाँको दरमा १६ करोड २२ लाख रुपैयाँ बराबरको एफपिओ जारी गर्न थालेको हो ।
मिर्मिरेले पनि प्रति कित्ता १७७.८ रुपैयाँको दरमा ५१ हजार ३१६ कित्ता, उन्नती सहकार्यले प्रतिकित्ता १५९ रुपैयाँको दरमा एक लाख ७८ हजार ४५१ कित्ता, समता घरेलुले प्रतिकित्ता १५९.०७ रुपैयाँको दरमा २ लाख ८९ हजार ४४० कित्ता र नयाँ सारथीले प्रति कित्ता ११६ रुपैयाँको दरमा तीन लाख २९ हजार ६४९ कित्ता एफपिओ बिक्री गर्न थालेको हो ।
कम्पनीहरुले सर्वसाधारणका लागि कुल २८ करोड ४० लाख ६० हजार ६६३ रुपैयाँको शेयर जारी गर्दैछ । नेपाल राष्ट्र बैंकले लिएको मर्जरको नीति सँगै नयाँ र पुराना लघु वित्तीय वित्तीय संस्थाको मर्जरको लहर बढ्दै गएको छ । नयाँ र पुरानो लघुवित्त मर्जर हुँदा सर्वसाधारण र संस्थापक विचको स्वाप रेसियो मिल्दैन । त्यसैले सर्वसाधारण समुह तर्फ ३० प्रतिशत बनाउन कम्पनीहरुले एफपिओ जारी गर्नु परेको हो ।
