काठमाडौं । एनआईसी एशिया बैंकको स्वामित्वमा रहेको दुई कम्पनीको १ लाख १३ हजार १८३ कित्ता संस्थापक शेयर सर्वसाधारणमा विक्री खुला भएको छ । बैंकको स्वामित्वमा रहेको महुली लघुवित्त वित्तीय संस्था लिमिटेडको ५ हजार १८३ कित्ता र सूर्योदय वोमी लघुवित्त वित्तीय संस्था लिमिटेडको १ लाख ८ हजार कित्ता संस्थापक शेयर सर्वसाधारणमा विक्री खुला भएको हो ।
जेठ १६ गतेदेखि विक्रीमा रहेको महुली लघुवित्तको शेयर प्रतिकित्ता २६४ रुपैयाँ र सूर्योदय वोमी लघुवित्तको प्रतिकित्ता २३७ रुपैयाँमा विक्रीमा गरेको जनाइएको छ । शेयर खरीद गर्न इच्छुक खरीदकर्ताले जेठ २३ गतेसम्म आवेदन दिन सक्नेछन् ।
यसअघि विद्यमान संस्थापक शेयरधनीहरूले मात्र खरीद गर्न पाउने गरी यो शेयर विक्री खुला गरिएको थियो । विद्यमान संस्थापक शेयरधनीहरूबाट खरीद माग नभएपछि अन्य व्यक्ति तथा संस्थाहरूले समेत खरीद गर्न पाउने गरी उक्त शेयर विक्रीमा ल्याइएको हो ।
तोकिएको मूल्य वा सोभन्दा बढी मूल्य अंकित गरी महुली लघुवित्तको शेयर खरीदका लागि न्यूनतम ५०० कित्ता र अधिकतम सम्पूर्ण कित्तासम्म माग गर्न सकिनेछ । सूर्योदय वोमी लघुवित्तको शेयर खरीदका लागि भने न्यूनतम १०० कित्तादेखि अधिकतम सम्पुर्ण कित्ताका लागि माग गर्न सकिनेछ ।
