काठमाडौं । एनआइसी एशिया बैंकले चालु आर्थिक वर्षको ९ महिनाको अवधिमा ४ अर्ब एक करोड रुपैयाँ मुनाफा आर्जन गरेको छ । बैंकले गत वर्षको भन्दा ११.३८ प्रतिशतले मुनाफा बढाउन सफल भएको हो । बैंकको वितरण योग्य मुनाफा भने तीन अर्ब २ करोड रुपैयाँ छ ।
मुनाफामा सुधार सँगै जगेडा कोष ४४ प्रतिशतले बढेको छ । लगातार दुई आर्थिक वर्षदेखि लाभांश वितरण गर्न नपाएको बैंकको जगेडा कोषमा १४ अर्ब १९ करोड नाघेको छ । यदि नेपाल राष्ट्र बैंकले बैंकलाई बोनस शेयर वितरण गर्न अनुमति दिएमा बैंकले सत प्रतिशतसम्म बोनस शेयर दिन सक्ने क्षमता राखेको छ ।
चुक्ता पूँजी ११ अर्ब ५६ करोड रहेको बैंकको पूँजीकोष अनुपात १२.६४ प्रतिशत रहेको छ । बैंकले प्राथमिक पूँजीकोष ८ प्रतिशत पुर्याउन नसक्दा राष्ट्र बैंकले लाभांश वितरणमा रोक लगाउदै आएको छ । यस्तो पूँजी पुर्याउनका लागि बोनस शेयर दिन रोक लगाउदै मर्जरका लागि दवाव दिदै आएको छ ।
समिक्षा अवधिमा बैंकले तीन खर्ब १४ अर्ब रुपैयाँ निक्षेप संकलन गरी ३ खर्ब ३२ अर्ब रुपैयाँ कर्जा विस्तार गरेको छ । दुबैमा सामान्य सुधार देखिएको छ । खराव कर्जा ०.८५ प्रतिशत रहेको छ । प्रतिशेयर आम्दानी ४१ रुपैयाँबाट ४६ रुपैयाँ पुगेको छ ।
