काठमाडौं । बैंकिङ प्रणालीमा निक्षेप संकलन बढ्न थालेको छ । भदौ दोस्रो सातादेखि लगातार बढिरहेको निक्षेप असोज पहिलो सातामा मात्रै थप २६ अर्बले बढेको छ । बाणिज्य बैंकहरुले असोज पहिलो सातामा निक्षेप २६ अर्बले बढाएर ४५ खर्ब १२ अर्ब रुपैयाँ पुर्याएका छन् ।
त्यस्तै कर्जा विस्तार भने जम्मा चार अर्बले मात्रै बढाएका छन् । बाणिज्य बैंकहरुले असोज पहिलो सातामा ४१ अर्ब ९४ अर्ब रुपैयाँ कर्जा लगानी गरेका छन् । विदेशमा गएका नेपालीहरुले दशैको अवसरमा रेमिट्यास पठाउदा बैंकिङ प्रणालीमा निक्षेप बढेको हो ।
अर्को तर्फ व्यवसायीहरुले साउन भदौमा विदेशबाट सामान आयात गर्दा निक्षेप घटेको थियो । दशैमा व्यवसायीहरुले बजारबाट पैसा उठाएर बैंकिङ प्रणालीमा ल्याउदा पनि निक्षेपमा टेवा पुर्याएको हो । चाडवाड सँग आर्थिक क्रियाकलाप बढ्दा बैंकिङ प्रणालीमा निक्षेप आएको हो । गत भदौ १० गते एता एक महिनाको अवधिमा मात्रै निक्षेप ८६ अर्ब रुपैयाँले निक्षेप भित्रिएको छ ।
गत असार साउनमा मात्रै सवा खर्ब रुपैयाँ निक्षेप बाहिरिएको थियो । असार साउनमा बाहिरिएको निक्षेप विस्तार बैंकिङ प्रणालीमा आउन थालेको छ । कर्जा विस्तारमा भने बैंकहरु अझै पनि पर्ख र हेरको अवस्थामा छन् । यहि हिसावले निक्षेप बढ्दै गयो भने बैंकहरु दोस्रो त्रैमाशदेखि कर्जा विस्तारमा आक्रामक हुने देखिन्छ । आगामी कार्तिकदेखि आधार व्याजदर बढ्नुका साथै कर्जाको व्याजदर पनि बढ्नेछ । त्यसैले अहिले बैंकहरु कर्जा विस्तार नगरी चुप लागेर बसेका छन् ।
