काठमाडौं । आज असोज २ गतेबाट सबै वाणिज्य बैंकबाट दशैंको लागि नयाँ नोट सटही गर्न सकिने भएको छ । राष्ट्र बैंकले सर्वसाधारणलाई नयाँ नोट सुकिलो नोट सटहीका लागि काठमाडौं उपत्यका (काठमाडौं, ललितपुर र भक्तपुर जिल्ला भित्रका कम्तीमा ५ वटा शाखा कार्यालयहरु तोकी आफ्नो वेबसाइट मार्फत् सूचना दिन वाणिज्य बैंकहरुलाई निर्देशन दिएको छ।
सोही सूचनामा नयाँ नोट सुकिलो नोट सटही गर्ने समयावधि र संख्या समेत उल्लेख गर्न राष्ट्र बैंकले भनेको छ । राष्ट्र बैंकले सर्वसाधारणलाई रु.५, रु.१०, रु.२०, रु.५० र रु.१०० दरको प्रति व्यक्ति बढीमा एक एक प्याकेटका दरले जम्मा रु १८,५०० सम्म सटही सुविधा उपलब्ध गराउन सकिने जनाएको छ।
राष्ट्र बैंकले वडा दशैं २०७९ को अवसरमा सर्वसाधारणलाई नयाँ नोट सटही गर्न सहज होस् भनी यस वर्ष सम्पूर्ण वाणिज्य बैंकहरुलाई नयाँ नोट उपलब्ध गराई सकेको छ।
