काठमाडौं । रिलायन्स लाइफ इन्स्योरेन्स कम्पनीले बीमित सर्जन विकको परिवारलाई दुई करोड ५० लाख रुपैयाँ मृत्यु दाबी भुक्तानी गरेको छ । बुधबार एक कार्यक्रमका विच बीमा समितिका अध्यक्ष सूर्य प्रसाद सिलवालले विकको श्रीमती सपना मल्ललाई साढे दुई करोड रुपैयाँको चेक हस्तान्तरण गरेका हुन् । बीमित विकको २०७८ बैशाख २ गते राति ११ बजे सवारी दुर्घटनामा परि उपचारका क्रममा मृत्यु भएको थियो ।
विकले २०७७ फागुन २७ गते एक करोड २० लाख रुपैयाँ बीमाङ्क बरारबरको ‘रिलायन्स सिमित भुक्तानी सावधिक जीवन बीमालेख’ खरिद गरेका थिए । यो सँगै विकले ३० लाख रुपैयाँ बीमाङ्क बरारबको टर्म पोलिसी खरिद गरेका थिए । टर्म पोलिसीको दुर्घटना जोखिम बापत ६० लाख रुपैयाँको दाबी प्राप्त गरेका छन् । त्यस्तै एक करोड २० लाख रुपैयाँ बराबरको सावधिक जीवन बीमा बापत एक लाख रुपैयाँ बीमाङ्क र अतिरिक्त जोखिम बहन बापत ७० लाख रुपैयाँ सहित उनको परिवारले २ करोड ५० लाख रुपैयाँ दाबी प्राप्त गरेको हो ।
विमित विकले २० वर्ष अवधि राखेर सावधिक जीवन बीमा योजना खरिद गरेका थिए । उक्त बीमा पोलिसी खरिद गर्ने क्रममा उनले ५ लाख २२ हजार ८८० रुपैयाँ प्रथम बीमा शुल्क भुक्तानी गरेका थिए । त्यस्तै ३० लाख बीमाङ्कको टर्म पोलिसी ५ वर्ष अवधिको खरिद गरेका थिए । यो पोलिसीको प्रथम बीमा शुल्क १० हजार ३५० रुपैयाँ भुक्तानी गरेका थिए । दुई वटा पोलिसीको एकै पटक दाबी भुक्तानी गरिएको हो ।
बीमा समितिका अध्यक्ष सिलवाले कम्पनीहरुले दाबी भुक्तानी गर्दैनन् भन्ने सन्देशलाई चिर्दै समयमै दाबी भुक्तानी गरेकोमा धन्यवाद दिए । सञ्चार माध्यमले सधै बीमा कम्पनीहरुलाई दाबी भुक्तानी नगरेको भन्दै आरोप लगाउने गरेको भन्दै सिलवालले सम्पुर्ण कम्पनीहरुलाई करार अनुसार दाबी भुक्तानी गर्न निर्देशन दिएका छन् ।
बीमा कम्पनीहरुले अण्डरराइटिङमा विचार नपुर्याउदा दाबी भुक्तानीमा समस्या देखिएकाले सम्पुर्ण प्रकृयाँ पुरा गरेर मात्रै बीमा गर्न सिलवालले अनुरोध गरेका छन् । उनले भने ‘बीमा गराउने अभिकर्ताले बीमितलाई स्पष्ट सँग बीमा गर्दा के के सर्तहरु रहेका छन् र बीमितले पाउने कुराहरु के के हुन् भनेर बताउनुपर्छ ।‘
