काठमाडौं । नेपाल स्टक एक्सचेन्ज (नेप्से)मा सूचीकृत १९ वटा वाणिज्य बैंकमध्ये ४ वटाले मात्रै आर्थिक वर्ष २०८०।८१ का लागि लाभांश घोषणा गरेका छन्।
एभरेष्ट बैंक, सिटिजन्स बैंक, सानिमा बैंक र ग्लोबल आइएमई बैंकले मात्रै लाभांश घोषणा गरेका हुन् भने अन्य १५ वटाले घोषणा गर्न बाँकी छ। एभरेष्ट बैंकले उक्त आर्थिक वर्षका लागि चुक्तापुँजीको कुल १५.५३ प्रतिशत लाभांश वितरण गर्ने घोषणा गरेको थियो। यो लाभांश पारित गर्न गत असोज २० गते सम्म बैंकको ३० औँ वार्षिक साधारणसभा पारित भइसकेको छ। बैंकले असोज ८ गते बुक क्लोज गरेको थियो। यसको अर्थ गत असोज ७ गतेसम्म कायम शेयरधनीहरुले एभरेष्ट बैंकको लाभांश पाउनेछन्।
यसैगरी सिटिजन्स बैंकले उक्त आर्थिक वर्षको वितरणयोग्य मुनाफाबाट २०८१ असार मसान्तको चुक्तापुँजी १४ अर्ब २० करोड ९ लाख ७४ हजार ६ रुपैयाँको कुल ४.२१ प्रतिशत लाभांश वितरण गर्ने निर्णय गरेको छ। जसमा ४ प्रतिशतले हुन आउने ५६ करोड ८० लाख ३८ हजार ९६०.२३ रुपैयाँबराबरको बोनस शेयर र कर प्रयोजनार्थ ०.२१ प्रतिशतले हुन आउने २ करोड ९८ लाख ९६ हजार ७८७.३८ रुपैयाँबराबरको नगद लाभांश छन्। बैंकले लाभांश अनुमोदन आफ्नो १८ औँ वार्षिक साधारणसभा आउँदो कात्तिक १२ गते काठमाडौंको डिल्लीबजारस्थित अमृतभोगमा बिहान ९ बजे डाकेको छ। बैंकले लाभांश र वार्षिक साधारणसभा प्रयोजनार्थ असोज २९ बुक क्लोज गर्ने निर्णय गरेको छ। यसको अर्थ असोज २३ गतेसम्म कायम शेयरधनीहरुमात्रै यो बैंकको लाभांश पाउन र सभामा भाग लिन योग्य भएका छन्।
यसैगरी सानिमा बैंकले गत आर्थिक वर्षको मुनाफाबाट आफ्ना शेयरधनीलाई कुल ५.२६३२ प्रतिशत लाभांश घोषणा गरेको छ। ग्लोबल आइएमई बैंकले गत वर्षको मुनाफाबाट आफ्ना शेयरधनीलाई कुल ५.५ प्रतिशत बोनश शेयरमात्रै दिने घोषणा गरेको छ । सानिमा र ग्लोबल आइएमई बैंक दुवैले वार्षिक साधारणसभा भने डाकिसकेका छैनन्।
गत आर्थिक वर्ष २०८०।८१ को वित्तीय विवरण केलाउँदा १६ वटा वाणिज्य बैंकहरुको मात्रै लाभांश वितरण गर्ने क्षमता देखिएको छ भने ४ बाँड्न नसक्ने देखिएको छ। उक्त आर्थिक वर्षका लागि सर्वाधिक लाभांश वितरण गर्न सक्ने क्षमता एभरेष्ट बैंकले बनाएको थियो। यो बैंकले २९.८६ प्रतिशत लाभांश वितरण गर्न सक्ने देखिएको थियो। तर, बैंकले कुल १५.५३ प्रतिशतमात्रै लाभांश वितरण गर्ने भएको छ।
दोस्रो धेरै लाभांश क्षमता भएको बैंकमा स्ट्यान्डर्ड चार्टर्ड रहेको छ। यो बैंकले साढे २६ प्रतिशत लाभांश बाँड्ने सक्ने देखिएको छ।
यसैगरी कृषि विकास बैंक तेस्रो स्थानमा रहेको छ। यो सरकारी बैंकले लगानीकर्तालाई १७.३७ प्रतिशत लाभांश दिने क्षमता बनाएको छ।
नबिल बैंकले १४.२६ प्रतिशत, नेपाल एसबीआई बैंकले १०.७६ प्रतिशत र सानिमा बैंकले १०.४ प्रतिशत लाभांश वितरण गर्न सक्ने क्षमता बनाएका छन्।
बाँकी १० वटा बैंकले भने सिंगल डिजिटलमा लाभांश वितरण गर्न सक्ने क्षमता बनाएका छन्। एनआईसी एसिया, हिमालयन, कुमारी र नेपाल इन्भेस्टमेन्ट बैंकले भने लाभांश दिन सक्ने देखिएको छ।
राष्ट्रिय वाणिज्य बैंक नेप्सेमा सूचीकृत छैन। यो बैंकको लाभांश क्षमता भने ३.७२ प्रतिशत देखिएको छ।
गत आर्थिक वर्षमा २० वटा वाणिज्य बैंकहरुले कुल ६४ अर्ब १५ करोड ३० लाख रुपैयाँ नाफा आर्जन गरेको थिए।
अघिल्लो वर्ष ५६ अर्ब ५७ करोड ४४ लाख रुपैयाँ नाफा आर्जन गरेका थिए। अघिल्लो वर्षको तुलनामा गत वर्ष बैंकहरुको नाफा १३.४० प्रतिशतले बढेको थियो।
