काठमाडौं । चालु आर्थिक वर्षको ७ महिना माघसम्म ६ हजार बढी विद्युतीय सवारीसाधन (कार, जिप र भ्यान) भित्रिएका छन्।
भन्सार विभागले सार्वजनिक तथ्यांकअनुसार यो ७ महिनामा ६ हजार १५९ विद्युतीय सवारीसाधन भित्रिएको हो। जुन १५ अर्ब ४ करोड रुपैयाँबराबरको हो। यी सवारीसाधन भित्रिँदा सरकारले ७ अर्ब ४३ करोड ७९ लाख रुपैयाँ राजस्व संकलन गरेको छ।
माघ महिनामा मात्रै १ हजार ५२ वटा ईभी गाडी नेपाल आयात भएको विभागले जनाएको छ । तथ्यांकअनुसार विद्युतीय गाडी पुसमा १ हजार ४२१ वटा, मंसिरमा ८९९ वटा, कात्तिकमा ६५२ वटा, असोजमा १ हजार २३७ वटा, भदौमा ७८८ वटा र साउनमा ११० वटा भित्रिएका छन्।
विभागका अनुसार माघसम्म १२ अर्ब ५२ करोड ५६ लाख रुपैयाँबराबरको इन्धन गाडी भित्रिएका छन्। यी गाडीबाट सरकारले १७ अर्ब ५७ करोड ८९ लाख रुपैयाँ राजस्व प्राप्त गरेको छ।
