काठमाडौँ । समता लघुवित्त वित्तीय संस्था लिमिटेडको सातौँ वार्षिक साधारण सभा पुस १४ गते मंगलबार हुने भएको छ । संस्थाको आज मंसिर १९ गते, बसेको सञ्चालक समितिको बैठकले गरेको निर्णय अनुसार संस्थाको सातौँ वार्षिक साधारण सभा पुस १४ गते मंगलबार, होटल क्लासिक, सिमरा, बारामा बिहान १०ः३० बजेबाट सुरू हुने जनाएको छ ।
सभामा संस्थाको भाद्र ५ गते शुक्रबार बसेको सञ्चालक समितिको बैठकले गरेको निर्णय अनुसार आर्थिक वर्ष २०७६/७७ को मुनाफाबाट कम्पनीका शेयरधनीहरूलाई २० प्रतिशत बोनस र ६ दशमलव ३२ प्रतिशत नगद गरी कुल २६ दशमलव ३२ प्रतिशत लाभांश वितरण गर्ने विशेष प्रस्ताव पारित गरिनेछ ।
संस्थाले साधारण सभा तथा लाभांश वितरण गर्ने प्रयोजनका लागि पुस ५ गतेदेखि पुस १४ गतेसम्म बुकक्लोज गर्ने निर्णय गरेको छ । त्यसैले, पुस ४ गतेसम्म नेप्सेमा कारोबार भइ कायम शेयरधनीले मात्र साधारण सभामा भाग लिन तथा लाभांश प्राप्त गर्न सक्नेछन् ।
