काठमाडौं । नेपाल राष्ट्र बैंकले वित्तीय सेवा लिनुअघि सर्तहरु पढ्ने र बुझ्ने गर्नुपर्ने सुझाव दिएको छ। वित्तीय चेतनाका लागि आज एक सूचना जारी गर्दै केन्द्रीय बैंकले यस्तो सुझाव दिएको हो।
जुनसुकै वित्तीय कारोबार गर्दा वित्तीय सेवा प्रदायक र ग्राहक दुवै पक्ष निश्चित सर्तमा बाँधिएका हुन्छन्। ‘सतहरुको पूर्ण पालना गर्नु दुवै पक्षको कानुनी दायित्व हो’, राष्ट्र बैंकले भनेको छ।
ग्राहकले वित्तीय सेवा लिँदा नबुझिएमा प्रश्न सोधी प्रस्ट हुने र हस्ताक्षर गरिएका कागजको एक प्रति आफूले सुरक्षित राख्नुपर्ने सुझाव पनि राष्ट्र बैंकले दिएको छ। ‘ग्राहकसँग प्रश्न सोध्ने र सर्तहरु बुझ्ने अधिकार हुन्छ भने ग्राहकलाई सर्तहरु बुझाउने जिम्मेवारी वित्तीय सेवाप्रदायक हुन्छ’, राष्ट्र बैंकले भनेको छ, ‘ग्राहकले सोधेका प्रश्नको सही र सरल जबाफ दिनु, ग्राहकको कारोबारसम्बन्धी पूर्ण सूचना र कागजात उपलब्ध गराउनु वित्तीय सेवाप्रदाकको दायित्व हो।’
‘त्यसैले भोलि पछुताउनुभन्दा हस्ताक्षर गर्नुअघि कागजमा लेखिएका सर्तहरु नबुझेसम्म प्रश्न सोध्ने गरौँ’, सूचनमा भनिएको छ।
