काठमाडौं । वर्ष २०८० शेयर बजारका लागि स्थिरजस्तै रह्यो। यो एक वर्षको अवधिमा नेप्से परिसूचक ९०.८३ अंक अर्थात ४.७० प्रतिशत वृद्धि भएर २०२५.३० को विन्दुमा बन्द भएको छ। वर्ष २०७९ मा नेप्से परिसूचक १९३४.४७ विन्दुमा बन्द भएको थियो।
नेप्सेमा कारोबार हुने १३ समूहगत परिसूचकमध्ये ११ समूहगत परिसूचक यो वर्ष बढेका छन्। हाइड्रोपावर र वाणिज्य बैंकको परिसूचक मात्र यो वर्ष घटेको देखिन्छ। हाइड्रोपावरको सूचक सामान्य १.७२ प्रतिशतले घट्दा वाणिज्य बैंकको परिसूचक भने १५.५९ प्रतिशतले घटेको छ।
वृद्धि हुने ११ समूहगत परिसूचकमध्ये होटल तथा पर्यटनको परिसूचक यो वर्ष सर्वाधिक वृद्धि भएको छ। होटल तथा पर्यटनको परिसूचक ५३.०२ प्रतिशतले वृद्धि भएको छ। २०७९ चैत महिनामा ३३४४.६० को विन्दुमा बन्द भएको यस समूहको परिसूचक २०८० चैतमा ५११७.९७ विन्दुमा भन्द भएको छ।
त्यस्तै दोस्रोमा उत्पादन तथा प्रसोधन समूहको परिसूचक ४९.४९ प्रतिशतले वृद्धि भएको छ।
बढ्ने सूचक सबै नेप्सेभन्दा धेरै बढे
यो वर्ष वृद्धि भएका ११ समूहगत परिसूचक सबै नेप्से परिसूचकभन्दा धेरैले वृद्धि भएका छन्। सबैभन्दा थोरै वृद्धि भएको जीवन बीमा समूहको परिसूचक ६.०७ प्रतिशतले वृद्धि भएको हो।
