काठमाडौं । राष्ट्रिय बीमा संस्थानले आफ्नो भुक्तानीसम्बन्धी कारोबारहरुलाई नेपाल क्लियरिङ हाउसको डिजिटल माध्यमबाट भुक्तानी गर्न सक्ने गरी सम्झौता गरेको छ।उक्त सम्झौतापत्रमा संस्थानका तर्फबाट संस्थाका प्रशासक कविप्रसाद पाठक र एनसीएचएलका तर्फबाट संस्थाका प्रमुख कार्यकारी अधिकृत नीलेशमान सिंह प्रधानले हस्ताक्षर गरेका छन्।
राष्ट्रिय बीमा संस्थानले आफ्नो आन्तरिक भुक्तानी प्रणालीलाई आफ्नो बैंकका माध्यमबाट नेसनल पेमेन्ट्स इन्टरफेस (एनपीआई) मार्फत एनसीएचएल–आईपीएस र कनेक्ट आईपीएस ई–पेमेन्ट प्रणालीसँग जोडिएपछि सम्पूर्ण भुक्तानी विभिन्न कारोबार बैंक खाताहरुबाट सोझै गर्न सक्ने भएका छन् ।
साथै, संस्थानका बीमितहरुले आफ्नो बीमाशुल्क पनि अनलाइनमार्फत कनेक्ट आईपीएस ई–पेमेन्टबाट वा ५ हजारभन्दा बढी बैंक शाखाहरुबाट र एनसीएचएलसँग आबद्ध बैंक वित्तीय संस्था तथा भुक्तानी सेवा प्रदायकहरुको च्यानलहरुमार्फत पनि सजिलै तिर्न सक्नेछन्।
यी सबै कारोबारहरु सोझै संस्थान तथा लाभग्राहीका बैंक खाताहरुबाट हुनेछन्।
