काठमाडौं । अमेरिकामा मन्दीको डर अझै कायमै रहेको छ। तर, ब्ल्याक फ्राइडेका अवसरमा अनलाइन सपिङको नयाँ रेकर्ड कायम भएको छ। यस अवसरमा मानिसले ९.८ अर्ब डलरको अनलाइन खरिद गरे। यो गत वर्षको तुलनामा ७.५ प्रतिशतले बढी हो।
ब्ल्याक फ्राइडेको १ दिनअघि, थ्यांक्सगिभिङ डेमा अमेरिकामा जम्मा ५.६ अर्ब डलरको अनलाइन बिक्री भएको थियो। यसरी अमेरिकामा २ दिनमा कुल १५.४ अर्ब डलरको बम्पर बिक्री भएको छ। ब्ल्याक फ्राइडेका अवसरमा विश्वभर ७० अर्ब डलरको कीर्तिमानी अनलाइन बिक्री भएको छ। अमेरिकालगायत धेरै पश्चिमी देशमा थ्यांक्सगिभिङ बिहीबारदेखि साइबर सोमबारसम्म किनमेललाई शुभ मानिन्छ।
एडोब एनालिटिक्सका अनुसार गत वर्ष ब्ल्याक फ्राइडेमा ९.१२ अर्ब डलरको अनलाइन बिक्री भएको थियो। सबैभन्दा बढी बिक्री इलेक्ट्रोनिक्स, स्मार्ट घरेलु उपकरण, खेलौना र व्यायाम उपकरणको थियो। यो वर्ष ५.७ प्रतिशतले वृद्धि हुने अपेक्षा गरिएको थियो तर सोचेभन्दा धेरै राम्रो थियो।
अमेरिकाले मुद्रास्फीति र उच्च ऋण लागतको समस्या सामना गरिरहेको छ। उपभोक्ताको मनोबल पनि घटेको छ। तर, यसका बाबजुद पनि जनताले किनमेलको नयाँ कीर्तिमान बनाएका छन्।
कसरी सुरु भयो ब्ल्याक फ्राइडे ?
ब्ल्याक फ्राइडे सन् १९५० को दशकमा फिलाडेल्फियामा सुरु भएको थियो। त्यसपछि थ्यांक्सगिभिङ दिनपछि वरपरका सहरहरुबाट मानिस किनमेल गर्न ठूलो संख्यामा फिलाडेल्फिया आए। त्यसपछि यो एक प्रकारले परम्परा नै बन्यो। हरेक वर्ष यो अवसरमा किनमेल गर्न मानिस ठूलो संख्यामा आउने गर्दछन्। पसलहरुले पनि यो अवसरको भरपुर फाइदा उठाउँदै विभिन्न किसिमको छुट दिएर बिक्री बढाएका छन्। तर, यही समयमा ट्राफिक प्रहरी भीड नियन्त्रण गर्न हम्मेहम्मे पर्यो। भीड नियन्त्रण गर्न उनीहरुले १२ घन्टा काम गर्नुपरेको थियो र बिदा लिन पनि पाएनन्। यस कारणले यसलाई ब्ल्याक फ्राइडे नाम दिइएको थियो।
विस्तारै अमेरिकाका अन्य सहरमा पनि फैलियो। सन् १९६१ मा यसलाई बिग फ्राइडे भनेर पुनः नामकरण गर्ने प्रयास गरियो ताकि यसलाई सकारात्मक भाइब दिन सकोस्। तर, यो प्रयास सफल भएन। यस दिनको बढ्दो लोकप्रियतालाई देखेर पसलले सोहीअनुसार रणनीति बनाएका छन्। अवस्था यस्तो बन्यो कि सन् २००३ मा धेरै पसल बिहान ५ बजेदेखि खुल्न थाले। सोही वर्ष यो वर्षको सबैभन्दा लाभदायक दिन बन्यो। त्यसअघि डिसेम्बरको अन्त्यमा अमेरिकामा सबैभन्दा बढी बिक्री हुने गरेको थियो। –एजेन्सीको सहयोगमा
