काठमाडौं । नेपाली समाजमा केही शुभ कार्य गर्दा आफ्ना आफन्तलाई उपहार दिने चलन बर्षौ देखि रहँदै आएको छ । पहिले उपहार दिदाँ घरायसी एवं व्यक्तिगत रुपमा प्रयोग हुने सरसामानलाई उपहार स्वरुप दिने गरिन्थ्यो भने अहिले समय अनुसार उपहार पनि परिवर्तन हुँदै गएको छ ।
परिवर्तित समयसँगै पछिल्लो समय भने जीवन बीमालाई आम जनताको दैनिकीसँग जोड्दै जीवन बीमा पोलीसी उपहारका रुपमा दिने चलन बढ्दै गएको छ । विवाह, ब्रतबन्ध, जन्मदिन, पास्नी, गून्योचोलो, बैवाहिक बर्षगाँठ लगायतका शुभ कार्यमा बीमा पोलीसी उपहार दिने चलन बढ्दै गएको हो ।
सोही चलनको अनुसरण गर्दै यूनियन लाइफ इन्स्योरेन्स कम्पनी लिमिटेड बेसीशहर शाखाकी एजेन्सी म्यानेजर बबिता खनियाले आफ्नो विवाहको ११औँ बैवाहिक बर्षगाँठको अवसरमा आफ्नो जीवनसाथीलाई जीवन बीमा पोलिसी उपहार दिएकी छिन् । एजेन्सी म्यानेजर खनियाले आफ्नो जीवनसाथी प्रकाश सापकोटालाई कम्पनीको सावधिक जीवन बीमा योजना अन्तरगत २० लाखको बीमा पोलिसी उपहार स्वरुप दिएकी हुन् ।
बीमा पोलिसी हस्तान्तरण गर्दै उनले बीमा गर्दा आर्थिक बचत हुने र नोक्सानी भएको हकमा क्षतिपूर्तिको सुनिश्चिता भएको हुदाँ जीवन बीमा अतिआवश्यक रहेको बताइन् । जीबन बीमा गर्ने योजना पहिले नै बनाएको र बिशेष दिनमा उपहार स्वरुप दिदाँ आकर्षक उपहार हुने र अन्यलाई समेत उत्प्रेरणा मिल्ने हुदाँ सो उपहार दिएको उनले बताइन् ।
अन्य उपहार खरिद गर्न लाग्ने खर्चले एक बीमाशुल्क वापतको रकम भुक्तानी गर्न पुग्ने भन्दै उनले सो योजना बनाएको समेत बताएकी छिन् ।
राईनास नगरपालीका स्थित शौभाग्योदय नमुना मा.वि.का शिक्षक समेत रहेका सापकोटाले बैवाहिक बर्षगाँठको अवसरमा पाएको उपहारले खुशी लागेको बताए । यस्तो अभ्यासले समाजमा जीबन बीमा प्रति राम्रो सोचको विकास हुने र समाजमा बीमा सम्बन्धी सचेतना समेत बढ्ने उनले बताए ।
सो पोलिसी हस्तान्तरण कार्यक्रममा कम्पनीका बेसीशहर शाखाका कर्मचारी साथै अभिकर्ताहरुको उपस्थिती रहेको थियो ।
