काठमाडौं । भारतको गुजरातस्थित बनासकाँठा जिल्लामा एउटा थ्रिलर फिल्मको कथाजस्तो लाग्ने एउटा घटना सार्वजनिक भएको छ। डेढ करोडको बीमा दाबीका लागि एक व्यक्तिले गरेको एउटा आपराधिक हर्कतले प्रहरीलाई समेत अचम्ममा पारेको छ।
होटेलको ऋण चुक्ता गर्न ती व्यक्तिले शवलाई चिहानबाट निकालेर कारभित्र राखेर जलाएका थिए। तर, घटना भएको २४ घन्टाभित्रै प्रहरीले यो षड्यन्त्रको पर्दाफास गरेको छ।
दुई दिनअघि बनासकाँठाको बडगाम तहसीलको धनपुरा गाउँमा जलेको कार फेला परेको थियो। गाडीमा एक व्यक्तिको शव पनि थियो। जुन नराम्ररी जलेको थियो। कारको नम्बर प्लेट (जीजे०१ एचजे ९७१८)बाट प्रहरीले कार भगवान राजपूत नामको रहेको पत्ता लगायो। प्रारम्भिक अनुसन्धानबाट राजपुतको गाडीमा आगो लागेर मृत्यु भएको अनुमान गरियो।
प्रहरीले सुरुदेखि नै यस घटनामा केही माछा लागेको आशंका गरेको थियो। शव पहिचानका लागि फोरेन्सिक र डीएनए परीक्षणका लागि पठाइएको थियो। कारमा जलेको शव राजपुतको नभएको अनुसन्धानबाट खुल्यो।
राजपुतले आफ्नो होटलमा करोडौं ऋण लिएका थिए। ऋण तिर्नुको सट्टा बीमा दाबी गरेर पैसा जुटाउने उनले षड्यन्त्र रचे। उनले आफ्नो गाउँ ढेलानाको श्मशान गृहमा गाडिएको शव निकालेर गाडीमा राखेर धनपुरा गाउँको बाहिरी भागमा आगो लगाएका थिए।
राजपूतले डेढ करोडको बीमा दाबी पास गराउन यो खतरनाक कदम चालेका हुन्। उनले आफ्नो मृत्युलाई नाटकीय बनाउन यो फिल्मी षडयन्त्र तयार गरे।
अब सबैभन्दा ठूलो प्रश्न कारमा कसको शव जलेको हो। उक्त शव धनपुरा गाउँको श्मशान स्थलबाट निकालिएको हुनसक्ने प्रहरीको अनुमान छ। यो प्रश्नको जबाफ डीएनए रिपोर्ट आएपछि मात्र थाहा हुने प्रहरीले जनाएको छ।
