काठमाडौं । बैंकहरुको अन्तरबैंक ब्याजदर फेरि ३ प्रतिशत तल झरेको छ।
नेपाल राष्ट्र बैंकको पछिल्लो तथ्यांकअनुसार साउन २४ गते बैंकहरुको अन्तरबैंक ब्याजदर घटेर २.९९ प्रतिशतमा झरेको छ। अघिल्लो दिन साउन २३ गते अन्तरबैंक ब्याजदर ३ प्रतिशत थियो।
बैंकहरुमा तरलता थुप्रिनु र कर्जाको माग बढ्न नसक्दा अन्तरबैंक ब्याजदर घटेको हो। यो नीतिगत ३ प्रतिशतभन्दा तल झर्दा राष्ट्र बैंकले निक्षेप संकलन उपकरण प्रयोग गरेर बैंकिङ प्रणालीबाट तरलता प्रशोचन गर्ने गर्दछ।
साउन २४ मा बैंक तथा वित्तीय संस्थाको निक्षेप ५ अर्ब रुपैयाँले घटेर ६४ खर्ब ३२ अर्ब रुपैयाँमा झरेको छ। अघिल्लो दिन बैंकहरुको कुल निक्षेप ६४ खर्ब ३७ अर्ब रुपैयाँ थियो।
वाणिज्य बैंकहरुको निक्षेप पनि साउन २४ मा घटेर ५७ खर्ब ३ अर्ब रुपैयाँमा झरेको छ। अघिल्लो दिनसम्म कुल निक्षेप ५७ खर्ब ९ अर्ब रुपैयाँ थियो।
बैंकहरुको कर्जा लगानी भने ३ अर्ब रुपैयाँले बढेको छ। अघिल्लो दिनसम्म बैंकहरुको कुल कर्जा लगानी ५१ खर्ब ५३ अर्ब रुपैयाँ रहेकोमा साउन २४ मा बढेर ५१ खर्ब ५६ अर्ब रुपैयाँ पुगेको छ।
साउन २४ मा बैंकहरुको औसत सीडी रेसियो बढेर ७८.७५ प्रतिशत पुगेको छ।
