काठमाडौं । पाकिस्तानी सरकारले सरकारी स्वामित्वका तीनवटा बीमा कम्पनीमा रहेको लगानी विनिवेश (झिक्ने) निर्णय गरेको छ । र सरकारी स्वामित्व कायमै राख्न सम्बन्धित बीमकको सञ्चालक समितिले गरेको सिफारिसलाई अस्वीकार गरेको छ।
अर्थमन्त्री मुहम्मद औरङ्गजेबको अध्यक्षतामा बसेको सरकारी स्वामित्वको उद्यममा मन्त्रिपरिषद् समितिले तीनवटा सार्वजनिक क्षेत्रका बीमा कम्पनीलाई रणनीतिक र अत्यावश्यक घोषणा गर्न सञ्चालक समितिले गरेको सिफारिसहरूलाई पनि खारेज गरिदिएको स्थानीय अखबार एक्सप्रेस ट्रिब्यूनले उल्लेख गरेको छ।
मन्त्रिपरिषद् समितिले विस्तृत छलफलपछि नेशनल इन्स्योरेन्स कम्पनी लिमिटेड, स्टेट लाइफ इन्स्योरेन्स कर्पोरेशन र पाकिस्तान पुनर्बीमा कम्पनी लिमिटेडले रणनीतिक वा अत्यावश्यक सार्वजनिक संस्थाको मापदण्ड पुरा नगरेकाले अत्यावश्यक संस्थाको रूपमा वर्गीकरण नगर्ने निर्णय गरेको अर्थ मन्त्रालयले जारी गरेको विज्ञप्तिमा जनाइएको छ ।
वाणिज्य मन्त्रालयद्वारा नियन्त्रित पाँच सार्वजनिक संस्थामध्ये पाकिस्तान पुनर्बीमा कम्पनी र स्टेट लाइफ पहिले नै निजीकरण कार्यक्रममा समावेश गरि सकिएका छन् ।
