काठमाडौं । पर्यटन व्यवसायी उद्धव कँडेलले धादिङमा त्रिशूली नदी छेउमा ‘त्रिशूली भिला’ रिसोर्ट सञ्चालनमा आएको छ । १५ रोपनी क्षेत्रफलमा फैलिएको यो रिसोर्ट सप्ताहन्त र अघि पछि समेत काठमाडौं नजिकै रमणीय वातावरणमा रमाउन चाहने पर्यटकका लागि लक्षित गरेर सञ्चालनमा ल्याइएको हो ।
होटल सञ्चालक कँडेलले पृथ्वी राजमार्गको बेनीघाटमा त्रिशूली रिभरसाइड रिसोर्ट समेत सञ्चालन गरि रहेका छन् । नयाँ खुलेको भिल्लामा रिभरसाइड रिसोर्टको तुलनामा सुविधा सम्पन्न भिल्ला(बेग्लाबेग्लै घर) निर्माण गरिएका छन् । होटलका अनुसार कूल १२ वटा भिल्लामा आधुनिक सुविधा सहितका ३७ वटा कोठा छन् । होटलको निर्माण कार्य अझै पनि जारी रहेकाले तत्कालका लागि २० वटा कोठाबाट सेवा शुरु गरिएको छ। भिल्लामा साउना र स्टिम कोठाको सुविधा समेत छ।
यो रिसोर्टमा सभा सम्मेलन तालिम तथा भेला आयोजनाका लागि ३ सय सहभागिहरु अटाउन सक्ने ठूलो बैठक कक्ष समेत छ। सप्ताहन्तमा रमाउने आन्तरिक पर्यटकका साथै काठमाडौं उपत्यका र चितवन नजिकै रमणीय स्थलमा तालिम आयोजना गर्न चाहने तथा कर्मचारीहरुलाई पुनर्ताजगी गराउन चाहने संस्थागत ग्राहकका लागि सभा कक्ष उपयोगी हुनेछ।
शुरुवाती मूल्य ४ हजार रुपैयाँमा रातको खाना, शयन कक्ष र बिहानको नास्ताको सुविधा उपलब्ध गराईएको छ। ग्राहकको चाहना अनुसार थप सुविधा सहितका अन्य प्याकेज समेत उपलब्ध रहेको छ।
साहसिक पर्यटनलाई प्रवर्द्धन गर्ने उद्देश्यले होटलले त्रिशूली नदीमाथि स्काई साइक्लिङ, जिपलाइन र त्रिशूली नदीमा र्याफ्टिङको रोमाञ्चकारी मनोरञ्जन समेत दिई रहेको छ। पृथ्वी राजमार्गमा मालिंगा पछि अवस्थित त्रिशूली रिभरसाइड रिसोर्टबाट जिपलाइन वा स्काई राइडिङ गरेर भिलामा पहुँच गर्न सकिन्छ।
काठमाडौंबाट ६५ किलोमिटर र चितवनबाट ७० किलोमिटरको दूरीमा अवस्थित यो होटल पृथ्वीराजमार्ग खण्ड अन्तर्गत पर्ने वेनिघाटको मालिङ्गाबाट झोलुङ्गे पुल पार गरेर, स्का साइक्लिङ गरेर वा जिपलाइनबाट त्रिशुली नदी पारी पुग्नुपर्छ।
