काठमाडौं । चिनियाँ स्मार्टफोन निर्माता कम्पनी शाओमीले आफ्नो पहिलो इलेक्ट्रिक कार सार्वजनिक गरेको छ र यसको लागि अर्डर पनि लिन थालेको छ।
एक कार्यक्रममा कम्पनीका प्रमुख कार्यकारी अधिकृत ली जुनले कम्पनीको स्ट्यान्डर्ड एसयू७ मोडलको मूल्य २ लाख १५ हजार ९०० युआन (२९ हजार ८ सय ७२ अमेरिकी डलर) र म्याक्स भर्जनको मूल्य २ लाख ९९ हजार ९०० युआन हुने बताए। कम्पनीले आफ्नो पहिलो इलेक्ट्रिक कार लन्च गरेको २७ मिनेटमै ५० हजार अर्डर प्राप्त भएको जनाएको छ।
विश्वभर कारको बिक्री घटिरहेको बेला शाओमीले विद्युतीय कार बजारमा प्रवेश गरेको छ। जसका कारण मूल्यमा नयाँ प्रतिस्पर्धा सुरु भएको छ। यो निर्णयसँग विश्व कार बजारका खेलाडी टेस्ला र बीवाईडीसँग शाओमीले प्रतिस्पर्धा गर्न तयारी गरिरहेको छ। चीनमा टेस्लाको मोडल ३ को प्रारम्भिक मूल्य २ लाख ४५हजार ९०० युआन हो।
ली जुनले एसयू७ लाई एक पटक चार्जमा करिब ७०० किलोमिटरसम्म दौडन सक्ने दाबी गरेका छन्। यो टेस्लाको मोडल ३ भन्दा राम्रो हो जुन एक पटक चार्जमा ५६७ किलोमिटरसम्म चल्न सक्छ।
कम्पनीले एसयू७ ले आफ्नो फोन, ल्यापटप र अन्य उपकरणहरूमा प्रयोग हुने अपरेटिङ सिस्टम प्रयोग गर्ने अपेक्षा गरेको छ। यसलाई उपभोक्ताले यो मन पराउने आशा गरिएको छ। अनुसन्धान कम्पनी काउन्टरपोइन्टका अनुसार शाओमी विश्वभर स्मार्टफोन बिक्री गर्ने तेस्रो ठूलो कम्पनी हो। अन्तर्राष्ट्रिय बजारमा यसको हिस्सा १२ प्रतिशत छ।
विगत १ वर्षदेखि कम्पनीले एसयू७ लन्च गर्ने संकेत गर्दै आएको थियो। यस्तो अवस्थामा यसलाई पोर्सको टायकान र पानामेरा स्पोर्ट्स कार मोडलसँग तुलना गरिँदै आएको स्पष्ट छ।
शाओमीको यो नयाँ कार सरकारी स्वामित्वको बीएआईसी ग्रुपको कारखानामा उत्पादन हुनेछ। यो कारखाना बेइजिङमा छ र कम्पनीले १ वर्षमा कम्तीमा २ लाख कार उत्पादन गर्ने लक्ष्य राखेको छ। –एजेन्सी
