काठमाडौं । क्यानडाले अन्तर्राष्ट्रिय विद्यार्थीलाई दिने भिसा कटौती गर्ने निर्णय गरेको छ।
क्यानडाका प्रधानमन्त्री जस्टिन ट्रुडोले अन्तर्राष्ट्रिय विद्यार्थीलाई दिइने भिसा कटौती गर्ने निर्णय गरिएको जानकारी गराएका हुन्। सामाजिक सञ्जाल एक्समा एउटा स्ट्याटस पोस्ट गर्दै ट्रुडोले लेखेका छन्, ‘यस वर्ष हामीले अन्तर्राष्ट्रिय विद्यार्थीलाई दिने भिसामा ३५ प्रतिशतले कटौती गर्दैछौँ। अर्को वर्ष थप १० प्रतिशत भिसा कटौती गर्नेछौँ।’
आप्रवासीले क्यानडाको अर्थव्यवस्थमा फाइदा पुर्याइरहेको पनि ट्रुडोले उल्लेख गरेका छन्। ‘तर केही मानिसले हाम्रो सिस्टमको गलत ढंगले फाइदा उठाइरहेका छन् र अन्तर्राष्ट्रिय विद्यार्थीबाट उनीहरु फाइदा उठाउन चाहिरहेका छन्’, उनले लेखेका छन्, ‘त्यही भएर यस्तो निर्णय लिनुपरेको हो।’
क्यानडाको यो निर्णय अन्तर्राष्ट्रिय विद्यार्थीलाई अध्ययन भिसा पाउन मुस्किल हुने भएको छ। हाल क्यानडामा १० लाख ४० हजार अन्तर्राष्ट्रिय विद्यार्थी छन्। जुन अघिल्लो वर्षको तुलनामा २९ प्रतिशत बढी हो।
क्यानडामा स्थानीय छात्राको तुलनामा अन्तर्राष्ट्रिय विद्यार्थी तीनगुणा बढी पढाइ शुल्क तिर्नुपर्छ। क्यानडाको अर्थव्यवस्थामा अन्तर्राष्ट्रिय विद्यार्थीको वार्षिक करिब २२ अर्ब क्यानेडियन डलरको योगदान रहेको छ। यसका अलावाल करिब २ लाख २० हजार नयाँ रोजगारी पनि सिर्जना गर्छ। –एजेन्सी
