काठमाडौं । विश्वको सबैभन्दा पुरानो, ठूलो र लोकप्रिय क्रिप्टोकरेन्सी बिटक्वाइनको मूल्य आज पहिलोपटक १ लाख २१ हजार डलर नाघेको छ।
अमेरिकामा घाटा खर्च संकटका कारण बिटक्वाइनले गति लिइरहेको छ। यस वर्ष बिटक्वाइनको मूल्य ३० प्रतिशतले बढेको छ। धेरै मूल्य मोडेलहरुका अनुसार बिटक्वाइनको मूल्य २ लाख डलरदेखि १० लाख डलरसम्म पुग्न सक्छ। यदि बिटक्वाइनको मूल्य ३ लाख ७० हजार डलर पुग्यो भने यसको निर्माता सातोशी नाकामोटो विश्वकै सबैभन्दा धनीव्यक्ति बन्नेछन्। हाल एलन मस्क यो सिंहासनमा बसिरहेका छन्। उनको कुल सम्पत्ति ३६० अर्ब डलर रहेको छ।
नाकामोटोलाई बिटक्वाइनको निर्माता मानिन्छ। यद्यपि, विश्वमा कसैले पनि उनको अनुहार देखेको छैन।
नाकामोटोले अक्टोबर २००८ मा सार्वजनिक एमआईटी लाइसेन्सअन्तर्गत बिटक्वाइन श्वेतपत्र जारी गरे। बिटक्वाइनको पहिलो ब्लक जनवरी ३, २००९ मा टकसाल गरिएको थियो। यससँगै, बिटक्वाइन नेटवर्कको औपचारिक सुरुआत भयो।
जनवरी र जुलाई २००९ को बीचमा नाकामोटोले १० लाखभन्दा बढी बिटक्वाइन बनाएको विश्वास गरिन्छ। हालको मूल्य अनुसार नाकामोटोसँग लगभग १३० अर्ब डलरको बिटक्वाइन छ। यसअनुसार उनी हाल विश्वको १२ औँ धनी व्यक्ति हुन्।
यदि बिटक्वाइनको मूल्य ३ लाख ७० हजार डलर पुग्यो भने नाकामोटोको कुल सम्पत्ति ३७० अर्ब डलर पुग्नेछ। यसरी उनी मस्कलाई उछिनेर विश्वको सबैभन्दा धनी व्यक्ति बन्नेछन्।
सन् २०१० मा बिटक्वाइनको मूल्य ०.५ डलर थियो। एक वर्षपछि अर्थात् २०११ मा बिटक्वाइनको मूल्य ३१.९ डलर पुग्यो तर २०१२ मा यो १५.४ डलरमा झर्यो।
बिटक्वाइनको मूल्यमा पहिलो ठूलो उछाल सन् २०१३ मा आयो र यो १ हजार २४१ डलर पुग्यो। सन् २०१४ मा यो १ हजार ९३ डलर र सन् २०१५ मा फेरि४९२ डलरमा झर्यो। यसको मूल्य सन् २०१६ मा ९८२ डलर र २०१७ मा १९ हजार ८७० डलर पुग्यो। सन् २०१८ र २०१९ मा फेरि घट्यो।
सन् २०२० मा बिटक्वाइनको भाउ २९ हजार २९८ डलर, सन् २०२१ मा ६८ हजार ९९०, सन् २०२२ मा ४८ हजार १९९, सन् २०२३ मा ४४ हजार ६९७ र सन् २०२४ मा १ लाख ८ हजार २४४ डलर पुगेको थियो। – एजेन्सी
