काठमाडौं । बेलायतमा गरिएको एक अध्ययनले चिया र कफीजस्ता धेरै तातो पेय पदार्थ नियमित रुपमा पिउँदा अन्ननलीको क्यान्सरको जोखिम बढ्ने देखाएको छ। अनुसन्धानकर्ताहरुले लगभग १० लाख मानिसमा गरिएको यो अध्ययन अहिलेसम्मकै सबैभन्दा ठूलो अध्ययन भएको बताएका छन्।
अध्ययनले पत्ता लगाएको छ कि ‘धेरै तातो’ पेय पदार्थ पिउनेहरुमा ‘मनतातो’ चिया वा कफी पिउनेहरुको तुलनामा क्यान्सरको जोखिम लगभग तीनगुणा बढी थियो। यद्यपि, विज्ञहरुले यस प्रकारको क्यान्सर हुने जोखिम धेरै कम रहेको कुरामा जोड दिन्छन्। धेरै तातो तरल पदार्थले अन्ननलीबाट पेटसम्मको बाटोमा रहेका कोषहरुलाई क्षति पुर्याउन सक्छ।
अक्सफोर्ड विश्वविद्यालयको यो अनुसन्धान इन्टरनेशनल जर्नल अफ क्यान्सरमा प्रकाशित छ। अनुसन्धानले ६५ डिग्री सेल्सियस वा सोभन्दा माथिको तापक्रम भएको कुनै पनि तरल पदार्थलाई ‘धेरै तातो’ र सम्भावित रुपमा जोखिमपूर्ण श्रेणीमा वर्गीकृत गर्दछ। ९ लाख ७७ हजार २८२ मध्यम उमेरका पुरुष र महिलाको तथ्यांकअनुसार प्रति दिन ६ वा सोभन्दा बढी तातो पेय पदार्थ पिउँदा पनि जोखिम बढ्छ।
अनुसन्धानकर्ताहरुका अनुसार दूध थप्दा पेय पदार्थहरु थोरै चिसो हुन सक्छन्। तर, पिउनुअघि तिनीहरु अझ चिसो नभएसम्म पर्खनु राम्रो हुन्छ। कित्लीमा पानी उमालेपछि तुरुन्तै बनाइएको चिया लगभग १०० डिग्री सेल्सियसको उम्लने बिन्दुमा हुन्छ। कपमा खन्याएपछि यो तापक्रम लगभग ९० वा ९५ डिग्री सेल्सियसमा झर्छ। पेय पदार्थलाई सुरक्षित तापक्रममा चिसो हुन दिन पिउनुअघि केही मिनेट पर्खिन सिफारिस गरिन्छ।
क्यान्सर रिसर्च यूकेले तातो पेय पदार्थ कति समयसम्म चिसो हुन छोड्नुपर्छ भन्ने कुराको सही समयसीमा दिन गाह्रो भएको जनाएको छ। ‘तर, यदि तपाइँ चिन्तित हुनुहुन्छ भने हामी धेरै तातो हुँदा पिउनुको सट्टा पिउन सहज नभएसम्म पर्खन सिफारिस गर्छौं’, रिसर्चले भन्यो।
