काठमाडौं । बैंक अफ काठमाण्डू लिमिटेडले २६औं वार्षिक साधारण सभा मंसिर १५ गतेआह्वान गरेको छ । बैंकको आज बसेको सञ्चालक समितिको बैठकले गरेको निर्णयले उक्त सभाको मिति तय गरेको हो । उक्त सभा बैंकको प्रधान कार्यालय, कमलपोखरी, काठमाडौंमा भिडियो कन्फ्रेन्स मार्फत सञ्चालन हुने जनाएको छ ।
सभामा बैंकको असोज १४ गते, बुधबार बसेको सञ्चालक समितिको बैठकले गरेको निर्णय अनुसार आर्थिक वर्ष २०७६/०७७ को सञ्चित मुनाफाबाट बैंकका शेयरधनीहरूलाई १३ प्रतिशत बोनस शेयर र ३ प्रतिशत नगद (कर सहित) गरी कुल १६ प्रतिशत लाभांश वितरण गर्ने प्रस्ताव पारित गर्ने एजेण्डा रहेको छ ।
बैंकले साधारण सभा प्रयोजनका लागि कार्तिक २८ गते, शुक्रबारदेखि मंसिर १५ गते, सोमबारसम्म बैंकको बुक क्लोज गर्ने निर्णय गरेको छ । त्यसैले, कार्तिक २७ गते, बिहीबारसम्म नेप्सेमा कारोबार भई कायम शेयरधनीहरुले मात्र साधारण सभामा भाग लिन तथा लाभांश प्राप्त गर्न सकिने बैंकले जनाएको छ ।
