काठमाडौं । नेको इन्स्योरेन्स कम्पनी यही जेठ १७ गतेबाट २५ औं वर्षमा प्रवेश गरेको छ । २०५३ साल जेठ १७ गते बीमा समितिबाट अनुमति पाई कारोबार सुरु गरेको नेको इन्स्योरेन्सले २४ औं वसन्त पार गर्दै २५ औं वर्षमा प्रवेश गरेको हो ।
कोरोना भाइरसको महामारीका कारण नेको इन्स्योरेन्सले रजत जयन्तीको अवसरमा औपचारिक कार्यक्रम भने आयोजना गरेको छैन । यद्यपि बीमा सम्बन्धी जनचेतना र्याली सहित कार्यक्रम आयोजना गर्न चाहेको भएपनि कोरोनाकै कारण रोकिएको सो कम्पनीले जनाएको छ ।
२५ औं वर्षमा प्रवेश गरेको वर्ष रजत वर्ष भएकोले आगामी वर्ष भरि नै विभिन्न जनचेतनामूलक कार्यक्रम गरी मनाइने सो कम्पनीले जनाएको छ । कम्पनी सचिव तथा कानुन विभाग प्रमुख विष्णु धितालले भने, ‘हामी रजत वर्ष मनाउँदै छौं, यो हाम्रो र सिंगो बीमा क्षेत्रको लागि गर्वको विषय हो । वर्ष भरि नै बीमा जनचेतनामूलक विभिन्न कार्यक्रम तथा सामाजिक उत्तरदायित्व अन्तर्गत सहयोग गरेर मनाउने छौं ।’
सुरुमा प्रमोटर शेयरलगानीकर्ताको तीन करोडबाट सुरु भएको कम्पनी अहिले एक अर्ब चुक्ता पँुजि पुगिसकेको छ । २०५१ सालमा कम्पनी दर्ता गरी दुई वर्षको प्रयासपछि बीमा समितिबाट अनुमति पाएको थियो । नेको इन्स्योरेन्समा गैर आवासीय नेपाली तथा स्वदेशी व्यवसायी समुहको लगानी छ ।
